Enkelejd Alibeaj ka deklaruar pas mbarimit të seancës në Kuvend se delegimi i interpelancës ministres Elisa Spiropali ishte një akt i turpshëm. Sot opozita kishte kërkuar një interpelancë në lidhje me çështjen “McGonigal” dhe lidhjen e Ramës me të, por ky i fundit nuk ishte i pranishëm.
“Është shumë e turpshëm tallja me Parlamentin, ajo çfarë kemi kërkuar është që kryeministri ka detyrim politik, ligjor, të përgjigjet kërkesës për interpelancë. Faktet e dala nga drejtësia amerikane i referohen atij, të dhënat kanë dalë nga zyra e tij. Nëse nuk vjen ka ndodhur diçka. Në dy seanca nuk ka ardhur, pra s’kemi kryeministër.
Kjo interpelancë ka një veçanti, bëhet fjalë për të dhënë shpjegime për fakte që sipas drejtësisë amerikane, implikohet Edi Rama. Nëse nuk vjen, ne do vazhdojmë të bëjmë të njëjtën gjë. Jemi para një vepre penale. Kërkoj procedimin penal”, u shpreh ai.
Ndërkohë Alibeaj iu përgjigj edhe pyetjes së gazetarëve nëse do të marrë pjesë në protestën e 11 shkurtit apo jo.
“Unë protestoj gjithmonë, bazuar në ligj, mbi fakte dhe e kam bërë këtë gjithmonë, në mënyrën më serioze. Do jem gjithmonë atje ku kërkohet goditja e drejtpërdrejtë e kryeministrit. Do ta shohim këtë punë, e kam dhënë përgjigjen, sot jemi për një çështje të rëndësishme”, tha Alibeaj.
