Ditë e djeshme Komisioni Hetimor për shkarkimin e presidentit Ilir Meta, me në krye Ulsi Manjën filloi punën.
Ky komision do të shqyrtojë vendimet e Metës, për të vërtetuar nëse presidenti e ka shkelur apo jo Kushtetutën.
Ndërkohë ditën e sotme, Meta ka reaguar nëpërmjet një postimi në rrjetet sociale.
Presidenti i drejtohet gazetarëve, duke u thënë se e kanë çmendur me pyetjen, nëse do të shkojë apo jo në Parlament.
Kreu i shtetit ka thënë se do të paraqitet në Komisionet Hetimore, pasi si president i vendit, i takon të jetë shembull i bashkëpunimit institucional.
Postimi i Metës
Të dashur miqtë e mi gazetarë, Më “çmendët” me sms tuaja, si asnjëherë tjetër! Po ç’është kjo pyetje kaq absurde që më bëni të gjithë: A do shkoj tek Parlamenti?! Së pari, Presidentit si Kryetar i Shtetit, i takon të jetë shembull i bashkëpunimit institucional. Dhe besoj se në këto dy vite kam bërë gjithçka për të vendosur këtë bashkëpunim, në respekt të plotë të Kushtetutës, shtetit ligjor dhe interesit publik. Së dyti, unë mezi pres të kthehem tek Parlamenti.
Kujtojmë këtu se ditën e djeshme, Komisioi Hetimor hodhi poshtë dekretet e Metës për koncesionet dhe privatizimet.
