Pas humbjes së zgjedhjeve të 11 majit, Edmond Spaho ka njoftuar përfundimin e karrierës së tij parlamentare.
Në një reagim publik në rrjetet sociale, deputeti i Partisë Demokratike deklaroi se këto ishin zgjedhjet e fundit në të cilat mori pjesë si kandidat dhe falënderoi qytetarët për mbështetjen që i kanë dhënë për më shumë se tre dekada.
Spaho u shpreh i tronditur nga rezultati dhe gjendja aktuale e PD-së, duke e përshkruar situatën në të cilën ndodhet partia si të rëndë.
Ai shprehu shpresën që Partia Demokratike të gjejë forcën për të dalë nga kriza dhe të kthehet në një alternativë të vërtetë për vendin.
Reagimi:
Te nderuar miq,
Jam i shokuar me rezultatin e zgjedhjeve të 11 Majit! Këto zgjedhje ishin të fundit të karrierës sime aktive në Parlament.
Dëshiroj të falënderoj pafundësisht familjen time për sakrificat e mëdha që ka bërë gjatë 35 viteve për të më krijuar mundësinë të ndiqja pasionin tim.
Falënderoj antarët dhe simpatizantët e Degës së PD Maliq dhe të Qarkut Korçë për mbështetjen e vazhdueshme që më kanë dhënë. Pa ata nuk do kisha arritur asgjë në politikë.
Dëshiroj të falënderoj me shumë mirënjohje qytetarët që më besuan dhe votuan gjatë 35 viteve dhe t’ju kërkoj ndjesë që nuk munda të bëj edhe më shumë për ta.
I uroj Partisë Demokratike të gjejë forcën për të kaluar gjendjen e rëndë ku ndodhet dhe të arrijë të rikthehet në shpresë për Shqipërinë.
Me shumë mirënjohje, Edmond Spaho
