Zgjedhja e presidentit të ri është një nga temat më aktuale dhe të “nxehta” në fushën politike.
Ndërkohë që akoma nuk janë zyrtarizuar emrat e kandidatëve, aludimet nuk përjashtojnë emrin e ish-kryeministrit Fatos Nano.
Berisha u pyet në konferencën me gazetarët në lidhje me procesin për zgjedhjen e presidentit të ri. Ish-kryeministri u shpreh se nuk është shumë i interesuar për këtë proces, pasi më së shumti ka qenë i fokusuar te gara brenda partisë për postin e kryetarit.
“Unë po merrem me garën time, Komisioni i Rithemelimit ka përcaktuar dy përfaqësues që të merren me këtë çështje”, tha Berisha, i cili u ngacmua nga gazetarët nëse do të votonte pro emrit të Fatos Nanos si president i mundshëm.
Por erisha tha se Nano është në privatësinë e tij, dhe me humor u shpreh se nuk do të donte që ti prishte qetësinë ish-liderit të socialistëve.
“Unë mendoj që nuk ja vlen që tia prishim privatësinë atij, është mes të tjerave një lloj hedonisti, është mësuar me një mikroklimë, më mirë ta lëmë të vazhdojë”, tha Berisha.
Emri i Nanos është lakuar në disa raste për postin e presidentit, edhe pse socialistët janë shprehur se kandidati nuk do të jetë një funksionar apo ish-funksionar i tyre.
Vlen të kujtojmë që raundi i parë i zgjedhjes së presidentit do të konsumohet të hënën, ku në seancën e parë nuk pritet që socialistët të dalin me një emër, sa kohë që janë duke tentuar konsensusin me opozitën.
