Mazhoranca dhe opozita nuk e kanë për herë të parë që e kanë çuar vendin në prag të një krize të thellë, mirëpo këtë herë opozita duket më e vendosur se herët e tjera.
Djegia e mandateve është një nga gjestet që mund ta çojë vendin në zgjedhje të parakohshme, megjithatë vetvetiu lind pyetja nëse Ilir Meta do të luajë rolin e paraardhësve të tij, duke u bërë ndërmjetës?
Kujtojmë se kjo situatë ka qenë edhe në vitin 2006, ku ish- Presidenti Alfred Moisiu ka ulur në tavolinë shumicën e opozitës së atëhershme dhe ka bërë të mundur arritjen e marrëveshjes për zgjedhjet, duke shpëtuar kështu vendin nga kriza.
Të njëjtën gjë ka bërë në vitin 2010 edhe Bamir Topi, i cili uli Sali Berishën, atëherë kryeministër dhe Edi Ramën, i cili përfaqësonte opozitën, duke i kthyer në Parlament. Opozita në atë kohë kishte bojkotuar Parlamentin.
Ndërkohë që sot nuk dihet se çfarë mund të ndodhë.
Mirëpo i pyetur në studion e Opinion, Taulant Balla edhe pse me vështirësi i është përgjigjur pyetjes nëse i vinte një ftesë e tillë nga Presidenti Meta, si do t’i përgjigjej mazhoranca. Ai ka thënë se asnjëherë nuk mungon dëshira për të dialoguar me Partinë Demokratike dhe LSI-në
“E para duhet të sqarojmë korrekt me teleshikuesit, ajo që është shumë e rëndësishme është se nuk kemi të bëjmë me djegë por me dorëheqje individiuale të deputëteve. Unë them dhe kam bindjen që nuk e kanë seriozisht, kam bindje personale që nuk do të ndodhë. Ky është një proces që do të zgjasë disa muaj, flas për zëvendësimin e deputetëve, sepse dhe ata që do të vijnë do të jenë deputetë të opozitës. Dy parti kanë mandate, kurse PDIU mbështet maxhorancën dhe nuk do ti dorëzojë mandatet. Asnjëherë nuk mungon nga ana jonë dëshira për të dialoguar me Partinë Demokratike dhe LSI-në. Jemi të gatshëm për tu ulur me PD për Reformën Zgjedhore. Edhe një gjë zgjedhjet e përgjithshme do të zhvillohen vetëm në vitin 2021.”
