Pas hapjes së ambasadës në Jeruzalem, Izraeli pritet të ndihmojë Kosovën në procesin e vaksinimit COVID-19 duke i dërguar disa doza. Ka qenë Ministria e Jashtme e Kosovës ajo që e ka bërë të ditur lajmin në një njoftim ku thuhet se ka realizuar një takim virtual të koordinuar nga ambasada në Izrael mes Ministrit të Shëndetësisë së Kosovës, Armend Zemaj dhe Ministrit të Shëndetësisë së Izraelit, Yuli Edelstein. Takimi është zhvilluar për të diskutuar rreth ndihmës së Izraelit në sigurimin e vaksinave për qytetarët e Kosovës.
“Ambasada e Republikës së Kosovës në Izrael, në koordinim me Ministrinë e Punëve të Jashtme dhe Diasporës, ka organizuar një takim virtual mes Ministrit të Shëndetësisë së Kosovës, Armend Zemaj dhe Ministrit të Shëndetësisë së Izraelit, Yuli Edelstein. Ky takim është organizuar për të diskutuar rreth ndihmës së Izraelit në sigurimin e vaksinave anti-Covid19 për popullin e Kosovës”, thuhet në njoftim.
Kosova është nga vendet e Ballkanit që ende nuk e ka filluar procesin e vaksinimit, ndërsa pak ditë më parë kryeministri në detyrë, Avdullah Hoti ka bërë me dije se së shpejti në vend do të mbërrijnë dozat e para. Deri tani Kosova ka shënuar në total 78 380 raste të infektimeve me koronavirus, ndërsa 1723 persona kanë humbur jetën.
