Presidenti Ilir Meta në një deklaratë për mediat ka thënë se ka një plan për të mbrojtur votën në 25 prill, detajet e të cilit do t’i zbulojë në ditët në vijim. Ai ka thënë se nuk duhet të vihet dorë mbi votën dhe për këtë çdo shqiptar i ndershëm e patriot bie dakord. Meta ka bërë thirrje që që të gjithë t’i mbajnë duart larg nga vota dhe se drejtuesit e partive duhet të promovojnë kandidatë me integritet.
“Se ç’përmban ky plan do të njiheni në ditët në vijim. Çdo shqiptar i ndershëm dhe patriot pavarësisht bindjeve partiake është 100% dakord me Presidentin e Republikës që nuk duhet të vihet më dorë mbi votën sepse prandaj jemi në këtë situatë kaq të rëndë, që udhëheqim në nivel botëror për shpopullimin e vendit, pikërisht se niveli i lirisë së zgjedhjeve është katandisur në këtë situatë që e dini ju dhe që e di gjithë bota. Është një kusht i pakapërcueshëm nga BE për çeljen e negociatave. Të gjithë të mbajnë duart larg nga votat, të kontribuojnë për një fushatë civile dhe europiane, të gjithë të paraqesin alternativat e tyre. Është një gjë e mirë se përveç forcave politike keni mundësi të shpreheni dhe për kandidatin që preferoni duke dhënë një mesazh të qartë që drejtuesit e partive duhet të promovojnë njerëz me integritet që të respektojnë Kushtetutën dhe të jenë shembull i respektimit të ligjit”, tha Meta.
Presidenti i është kundërpërgjigjur edhe akuzave të Ramës i cili iu drejtua Lulzim Bashës pas një videoje të publikuar se vajzat e gratë duhet t’i mbrojnë nga Berisha e Meta. Ai ka thënë se asnjë gazetare nuk është ankuar për prekje me dorë nga presidenti megjithëse ka pranuar se ka vend për përmirësime.
“Nuk është ankuar ndonjë gazetare për prekje me dorë nga Ilir Meta dhe përkundrazi ju e dini sa i durueshëm dhe i respektueshëm kam qenë me të gjitha ju dhe e dini kush bën presione ndaj gazetarëve që bëjnë pyetje që nuk kanë kaluar nga zyra e propagandës më përpara apo pronarët e mediave të detyruar nga presionet, një pjese e tyre janë detyruar të anashkalojnë pyetjet provokuese. Sigurisht mund të ketë vend për përmirësime në sjellje me gratë, vajzave, nënave, do të bëjmë më të mirën për këtë drejtim. Por kur rekomandime të tilla vijnë nga një person kur dihet se si është sjellë me to është qesharake”, deklaroi Meta.
