Në Shqipëri ka nisur vaksinimi i mësuesve me vaksinat AstraZeneca që erdhën para pak ditësh në vend. Ndërkohë, shumë vende europiane e kanë pezulluar vaksinën pasi disa persona kishin shfaqur shenja të mpiksjes së gjakut. Ka pasur gjithashtu zëra se shumë mësues e kanë refuzuar vaksinën, ndërsa sot është publikuar edhe një formular që i detyron mësuesit të thonë edhe asryet pse nuk duhet ta marrin vaksinën.
Në formular thuhet se personi që e firmos duhet të jetë i ndërgjegjshëm se COVID është një sëmundje që po vret mijëra njerë në botë, se vaksinimi po bëhet për t’i mbrojtur mësuesit nga infektimi dhe se pasojat e refuzimit për t’u vaksinuar kanë pasoja tek njerëzit e tjerë që i rrethojnë.
Në fund atyre u kërkohet të tregojnë arsyen pse e refuzojnë vaksinën dhe të firmosin.
Kjo letër pa vulë e pa firmë mund të shihet edhe si një formë presioni për mësuesit që nuk duan ta marrin vaksinën, në një kohë që zërat për problemet që ajo shkakton kanë ardhur në rritje.
Kujtojmë që Gjermania, Franca, Italia dhe Spanja janë ndër vendet e BE që e kanë pezulluar përkohëisht vaksinimin me AstraZeneca. Më herët gjatë ditës së sotme një vendim të tilë e komunikoi edhe Suedia. Ndërkohë, OBSH dhe Agjencia Europiane e Barnave thanë se nuk ka prova që vaksina të ketë shkaktuar mpiksje të gjakut.
