Një tjetër humbje është shënuar nga bluzat e bardha mëngjesin e kësaj të diele. Mjeku veteriner, personaliteti i njohur, intelektuali dhe aktivisti, Sulejman Peza ka ndërruar jetë nga Covid. Ai humbi betejën në moshën 75-vjeçare.
Në shkurt të këtij viti ai mori edhe titullin “Nderi i Qarkut të Elbasanit”. Peza për kontributin e tij në fushën e veterinarisë është dekoruar disa herë nga Instituti Amerikan i Biografive me qendër në Universitetin e Kembrixhit dhe Uashington D.C me titujt “Personalitet i Shekullit XX”,”Personalitet publik Ndërkombëtar”.
Ky institut e ka vlerësuar me medaljen e artë dhe i ka dhënë dy herë titullin honorifik Guvernator, drejtor i institutit amerikan për Evropën.
Kujtojmë se dje ndërroi jetë një tjetër mjek. Covid-19 i mori jetën mjekut Geron Hysi në moshën 50 vjeçare. Husi ka punuar si mjek endokrinolog në Qendrën Spitalore Universitare “Nënë Tereza”.
Lajmi i trishtë u bë publik nga mjeku Tritan Kalo, me anë të një mesazhi prekës në Facebook, ku edhe shprehu ngushëllimet për kolegun e tij.
“Kohë kovidiane….13.03.2021….E pabesueshme por dhëmbshurisht e vërtetë….Sars-Cov2/Covid-19 edhe kësaj here goditi tinëzisht….Armatës së Mantelbardhëve nga sot e tutje do ti mungojë një anëtar i shquar i saj, Dr. GERON HUSI….Gojëmbëli, zemërmadhi, mëndjendrituri, buzëgazi, fjalëpaku dhe punëshumi si ai….”, shprehet Kalo.
