Me grumbullime të mëdha të qytetarëve dhe pa respektim të masave kundër Covid-19, partitë politike në Kosovë mbyllën dje fushatën për zgjedhjet e parakohshme parlamentare të së dielës.
Vëzhguesit i kanë kritikuar partitë për standarde të dyfishta në zbatimin e masave kundër koronavirusit ndërsa kanë shprehur shqetësimin për mundësinë e rritjes së numrit të të infektuarve pas zgjedhjeve.
Sipas vendimit të fundit të qeverisë së Kosovës për masat kundër Covid-19, nuk lejohen grumbullime të më shumë se 50 personave në mjedise të mbyllura ndërsa në hapësira publike jo më shumë se 80 persona.
Pavarësisht shkeljeve, nesër Kosova shkon në heshtje zgjedhore, kurse pasnesër qytetarët i drejtohen kutive të votimit.
Sipas sondazheve mediatike, në këto zgjedhje të parakohshme favorite për të fituar rezulton Lëvizja Vetëvendosje, teksa disa parti kanë shprehur dëshirat për koalicione, por me disa kushte.
Këto janë zgjedhjet e para që Kosova i zhvillon në kushte pandemie, por edhe pa shumë figura të njohura politike si Hashim Thaçi, Kadri Veseli, Rexhep Selimi apo Jakup Krasniqi.
Kujtojmë se zgjedhjet e 14 shkurtit përveç formimit të qeverisë duhet të krijojnë mundësinë për zgjedhjen e presidentit të ri të vendit, një proces që kërkon mbështetjen e dy të tretave të parlamentit 120 vendesh të Kosovës.
Për këtë post kandidaturën e kanë shpallur Vjosa Osmani që është në koalicion me lëvizjen Vetëvendosje dhe Ramush Haradinaj, kryetar i Aleancës për Ardhmërinë e Kosovës.
