Ditën e djeshme u publikua vendimi i Rektoratit të Tiranës për mbajtjen e provimeve online dhe jo në auditore. Pas muajsh mësimi online që ka shfaqur problematika të shumta, edhe provimet do të mbahen në të njëjtën mënyrë pa u bërë ende një plan se si do të veprohet për studentët që nuk kanë internet. Studentë dhe pedagogë kanë reaguar duke u shfaqur kundër këtij vendimi për arsyen e thjeshtë se shumë studente do diskriminohen për shkaqe ekonomike. Në disa fakultete, mbajtja e provimeve online është e pamundur pasi lëndët që zhvillohen aty janë praktike.
Pedagogu i fakultetit të Shkencave të Natyrës, Jani Marka shprehet se është kundër provimeve online për shkak të mungesës së internetit të mirë apo pajisejeve të nevojshme elektronike.
“Në parim jam kundër provimeve online. Së pari, për shkak të pamundësisë së studentëve për të pasur kompjuter dhe internet të mirë. Së dyti, ne nuk e kemi testuar një përvojë të tillë në të shkuarën, dhe në këtë kuptim kalimi në mënyrë masive në provimë online mund të jetë shumë problematik për vlerësimin e studentëve sipas merites dhe përpjekjeve të tyre.”
Më tej Marka shton se jo të gjitha provimet mund të mbahen online për shkak të specifikave që kanë. Sipas tij më mirë do të ishte mbajtja e provimeve në auditore me një plan masash anti-COVID.
“Mendoj se lende te ndryshme kane specifika te ndryshme, disa teknikisht edhe mund te zhvillohen online, ndersa te tjera jo. Do ishte me mire nje planifikim i provimeve ne auditor, ne numra te vegjel, duke respektuar edhe masat anti-covid.”, përfundon pedagogu dhe aktivisti i Lëvizjes për Universitetin.
Edhe vetë studentët janë kundër provimeve online. Ata thontë se nuk janë të pajisur me mjetet e nevojshme dhe ndodh që të mos kenë as akses në internet. Bruna Sollaku, studente dhe aktiviste e Lëviyjes për Univeristetin thiotë se provimet online janë diskriminuese për studentët.
“Jam kunder provimeve online për shumë arsye ku më kryesorja qëndron në faktin që pjesa dërrmuese e studentëve nuk janë të pajisur me mjetet e nevojshme . Përpos kësaj shumica e provimeve janë të pamundur t’i bësh online ku mundësitë për tu keqkuptuar janë të shumta.
Më tej ajo shton se provimet online janë penalizuese për shkak të mungesës së kushteve, madje shpesh edhe mungesës së energjisë elektrike.
“Po provimet online janë penalizuese për studentët. Vetë terimi “online” është diskriminues dhe aspak gjithëpërfshirës. Studentët nuk mund të zhvillojnë provimet online kur nuk kanë minimumin e kushteve ,akses në internet apo dhe paisjet e nevojshme. Sepse të gjithë e dimë që nuk mjafton thjesht një smartphone për të zhvilluar provimet. Nuk po lë pa permendur dhe faktin e shkëputjes së energjisë elektrike.”, përfundon Bruna.
Ndërkohë, edhe më problematike është situata në Universitetin e Mjekësisë, ku një pjesë e mirë e lëndëve janë praktike. Geraldina Mancka, studente e këtij universiteti thotë se studentët e UMT janë kundër provimeve online dhe kanë bërë kërkesë që t’i mbajnë në auditore.
“Provimi online për ne ështe i mundur vetëm për 2 ose 3 lëndë që ne nuk kemi orë praktike. Ne jemi kundër dhe kemi nisur dhe kërkesë që ti zhvillojmë në auditor. Dhe UMT ka bërë kërkesë te komiteti që të bëhen në auditor provimet.”, thotë Geraldina.
Mësimi online është shoqëruar me problematika të shumta, që nga mungesa e internetit e deri te mungesa e pajisjeve elektronike. Ende nuk ka një plan të miratuar për mbajtjen e provimeve online dhe akoma nuk dihet nëse është menduar diçka për studentët që kanë probleme me internetin. Nëse nuk sigurohet të paktën internet falas dhe pajisjet e nevojshme, qeveria ka dështuar totalisht në menaxhimin e situatës në universitete dhe shumë studente do jenë të përjashtuar për shkak të pamundësisë së tyre ekonomike për t’u arsimuar.
