Jo në Tiranë, por në Stamboll. Ky është qëndrimi i fundit zyrtar i Greqisë e cila ka pranuar që bisedimet për krizën e detin Egje të zhvillohen në 25 janar.
Kështu, Ministria e Jashtme greke i është përgjigjur pozitivisht ftesës ministrit të jashtëm turk, Mevlut Cavusoglu për nisjen e bisedimeve mes dy vendeve pas tensioneve që u krijuan në Detin Mesdhe. Në një reagim zyrtar, Ministria e Jashtme greke shprehet se bisedimet me Turqinë do të mbahen në Stamboll më 25 janar 2021.
Ministri turk Cavusoglu kishte propozuar Tiranës për zhvillimin e bisedimeve, por duket se ky opsion nuk qëndron më, pasi ato do të mbahen në Stamboll.
Pas ftesës së ministrit të Jashtëm turk për një takim në Tiranë, ka reaguar ministria e jashtme. Zëdhënësi i Ministrisë së Jashtme Alexandros Papaioannou konfirmon se nuk ka asnjë ftesë zyrtare nga Turqia, por në rast se do të ketë atëherë Greqia do e pranojë për të diskutuar e negociuar.
“Ministria e Jashtme Greke nuk ka marrë asnjë ftesë nga Ministria e Jashtme Turke në lidhje me të. Greqia, siç dihet, ka shprehur gatishmërinë e saj për t’iu përgjigjur, në rast të një ftese përkatëse nga pala turke, në bazë të Ligjit Ndërkombëtar mbi caktimin e zonës së EEZ dhe shelfit kontinental.”- tha Papaioannou.
Pak më parë Cavusoglu zbuloi ftesën e kryeministrit Rama që Turqia dhe Greqia të takohen për negociata në Tiranë, me të cilën ai i ka bëri thirrje Dendias të pranojë ftesën e Ramës.
Kryeministri Rama, gjatë vizitave që ka zhvilluar së fundmi në Turqi dhe Greqi, është investuar për të mundësuar një dialog të mundshëm mes dy vendeve ballkanike pas tensioneve të mëdha që kanë pasur me njëra-tjetrën. Ky lajm për rolin e Ramës është konfirmuar sot edhe nga ministri i jashtëm turk, Mevlut Cavusoglu, i cili i ka bërë një festë zyrtare Greqisë për të rifilluar bisedimet mbi pretendimet e tyre në Mesdhe. Në fjalën e tij ministri turk ka përmendur edhe njëherë ndikimin e kryeministrit Rama dhe ftesën e tij për të vazhduar bisedimet në Tiranë.
/Gazetareforma.com/
