Gjatë ditës së sotme në Kosovë, mësohet se janë raportuar nga Instituti Kombëtar i Shëndetësisë Publike (IKSHP), 206 raste të reja me covid-19 si dhe 6 viktima.
Instituti Kombëtar i Shëndetësisë Publike të Kosovës deklaroi se në Prishtinë dhe Fushë-Kosovë janë regjistruar nga dy viktima, ndërsa nga një në Mitrovicë dhe Prizren.
Rastet e reja pozitive ndërkohë, rezultuan nga testimi i 1,281 mostrave. Deri më tani, Kosova ka konfirmuar në total 53,982 raste me koronavirus dhe 1,383 viktima.
Po ashtu të shëruar janë 46,648 pacientë, prej tyre 389 në 24-orëshin paraprak. Raste aktive në Kosovë aktualisht janë 5,951.
Për shkak edhe të shtimit të rasteve kohëve të fundit, qeveria në ikje e Avdullah Hotit, në pajtim me Rregulloren e Punës së Qeverisë, ka mbajtur një mbledhje në të cilën është miratuar vendimi për masat e reja për mbrojtjen nga pandemia e koronavirusit të ri covid-19.
Duke u bazuar në rekomandimet e Institutit Kombëtar të Shëndetësisë Publike dhe Komitetit për Koordinimin dhe Vlerësimin e situatës emergjente nga pandemia e COVID -19, Ministria e Shëndetësisë ka propozuar vendimin për ndërmarrjen e masave të mbrojtjes nga pandemia covid-19.
Me këtë vendim të ri, u ndalohet veprimtaria të gjitha subjekteve afariste dhe bizneseve, qendrave tregtare e rekreative, supermarketeve, subjekteve që ofrojnë shërbimet e gastronomisë (restorantet, kafiteritë dhe të ngjashme) në të gjithë territorin e Republikës së Kosovës, prej orës 8 të mbrëmjes nga sot, deri të hënën e 9 nëntorit në orën 5 në mëngjes, përveç: furrave të bukës, barnatoreve, marketeve të vogla, pompave të derivateve.
Gjithashtu puna nuk u ndalohet institucioneve shëndetësore publike dhe private për nevoja mjekësore, prodhim, furnizim dhe shitje të mallrave esenciale; aktivitetet që ndërlidhen me menaxhimin e covid-19, si dhe operatorëve ekonomik dhe transporti i lirë i mallrave/shërbimeve për të siguruar funksionimin e furnizimit./Gazetareforma.com/
