Faton Peci, shefi i kabinetit të Ushtrueses së Detyrës së Presidentes, Vjosa Osmani, ka deklaruar se pas vendimit të Gjykatës Kushtetuese, Presidentja do të ftojë nesër në takim të gjitha partitë politike për të caktuar datën e zgjedhjeve.
“Ne planifikojmë qysh nesër të ftojmë të gjitha partitë politike për t’u dakorduar për datën e zgjedhjeve”, ka thënë Peci.
Ndër të tjera Peci është shprehur se vendimet e Gjykatës Kushtetuese janë obliguese për të gjitha institucionet.
Gjykata Kushtetuese në Kosovë nxorri mbrëmjen e sotme një aktgjykim pro kërkesës së Lëvizjes Vetëvendosje, për shpalljen të pavlefshëm votimin në Kuvendin e Kosovës për zgjedhjen e Qeverisë Hoti më 3 qershor.
Kjo pasi për qeverinë kishte votuar edhe deputeti Etem Arifi, i cili kishte një aktgjykim përfundimtar nga Gjykata e Apelit.
Gjykata Kushtetuese e ka hedhur poshtë votën e deputetit Etem Arifi dhe ka urdhëruar ushtruesen e detyrës së Presidentit Vjosa Osmani, që të shpallë zgjedhjet e parakohshme në afat prej 40 ditësh./Gazetareforma.com/
