Skuadra e Tiranës duket sikur po kalon një ngërç kohëve të fundit. Djemtë e Nevil Dedes duket sikur nuk po funksionojnë në fushë, ku pas humbjes në ndeshjen në Shkodër, bardheblutë vazhdojnë bllokadën e golave duke marrë vetëm një barazim 0-0 në “Selman Stermasi” ndaj Bylisit.
Një rezultat i tillë është përjetuar si humbje, pasi një ndalesë e tillë ka bërë që Tirana të humbasë kontaktin me kreun e tabelës në Superiore.
Ndërkohë në ndryshim nga Tirana, ekipi tjetër rival kryeqytetas, Partizani, ka triumfuar lehtësisht me rezultatin 0-3 në transfertën fierake ndaj Apolonisë.
Golat për skuadrën e Ilir Dajës u realizuan nga Eneo Bitri në pjesën e parë dhe Jurgen Bardhi e Hektor Idrizaj në pjesën e dytë të ndeshjes.
Me suksesin në transfertë në stadiumin “Loni Papuçiu”, Partizani u ngjit në kuotën e 7 pikëve, 1 më pak se Kastrioti i vendit të dytë, i cili vazhdon të surprizojë.
Sakaq skuadra e Kastriotit fitoi 1-2 në Korçë përballë Skënderbeut me gola të De Silvas dhe Okebugëut. Goli i Armah i vlejti vetëm për statistika skuadrës së Ahmatajt, i cili luajti me një lojtar më pak që nga minuta e 55-të pas daljes me karton të kuq të Mensah./GazetaReforma.com/
