Disa zyrtarë kurdë kanë bërë me dije se më shumë se 500 sirianë, ku pjesa më e madhe e tyre dyshohej se kishin lidhje me militantët e grupit të Shtetit Islamik (ISIS), janë larguar nga kampi i mbipopulluar Al-Hol.
Korrespondenti i agjensisë franceze të lajmeve, AFP, ka deklaruar se ka parë dhjetëra gra duke zhvendosur sendet e tyre në kamionë dhe të tjera duke ushqyer fëmijët e tyre para nisjes.
Largimin e tyre nga kampi Al-Hol, e kanë konfirmuar edhe organizata që merren me të drejtat e njeriut. Në këtë kamp dhe kampe të tjera të Sirisë, sipas Institutit për Siguri dhe Integrim nga Prishtina, që merret kryesisht me shtetasit e Kosovës të kthyer nga Siria, janë më pak se 100 persona nga Kosova, në mesin e të cilëve edhe gra e fëmijë.
Kujtojmë se së fundmi, katër fëmijë dhe një grua u kthyen në Shqipëri nga kampi Al-Hol i Sirisë, ku kanë qëndruar për rreth dy vjet.
Kampi Al-Hol drejtohet nga kurdët dhe aty mbahen të burgosur që dikur kanë qenë pjesë e grupit militant, Shtetit Islamik,(ISIS) ose familjarë të tyre./GazetaReforma.com/
