Vladimir Beja është ish-pjesëtar i grupit negociator për delimitimin e ujërave detare me Italinë dhe ish-komandant i Forcës Ushtarake Detare. Në një intervistë për “Gazetën Reforma”, lidhur me vendimin e kryeministrit Rama për ta çuar marrëveshjen detare me Greqinë në Gjykatën e Hagës, ai e quan një gabim, pasi çështjet e detit gjykohen në Hamburg.
Në Hagë diskutohen vetëm incidentet, si ai Korfuzit, thotë Beja. Gjithashtu, sipas tij, Shqipëria po ndihmon Greqinë, sepse ajo nuk ka kaluar akoma në 12 milje dhe është me kufi detar 6 milje.
Cilat çështje e marrëveshjes duhet të çohen nga Shqipëria në Hagë?
-Këmbëngul që nëse duhet shkuar me doemos, duhet të shkojmë në Hamburg dhe jo në Hagë! Gjykata e Hamburgut është Gjykata e krijuar pikërisht për të shuar mosakordin që mund të kenë palët në interpretimin e parimeve që përcakton Ligji Ndërkombëtar i Detit, siç quhet sot Conventa e Montego Bay! Është gjykatë e posaçme profesionale, ndryshe nga Haga! Është ende e panjohur, ende se cilat janë mosakordet Shqipëri- Greqi?! Përse zgjidhet Haga dhe jo Hamburgu ?!
Në diplomaci dhe politikë nuk ka asgjë të rastësishme, mund të jetë edhe një kërcënim, do t’iu çojmë atje ku ju [Shqipëria] keni humbur,” se Gjykata e Hagës e ka dënuar Shqipërinë për incidentin e pas-Luftës së Dytë Botërore me anijet angleze.
A duhet konsultuar Italia si palë të tretë?
Marrëveshjet janë dypalëshe. Një takim tripalësh mund të mbahet vetëm për të precizuar pikën ku takohet treshja e vijës kufitare të të tre shteteve. Situata e zgjedhur për ta çuar çështjen në gjykatë ndërkombëtare, ndihmon Greqinë. Ajo ka marrë goditje ndërkombëtare. Deklarimin nga Greqia për zgjerimin nga 6-12 milje në det e ka kritikuar rëndë nga sekretari i përgjithshëm OKB-së, i cili e ka quajtur të njëanshëm dhe të papranueshëm, njëkohësisht edhe BE më 1 dhe 2 tetor e ka kritikuar qeverinë greke për qëndrim të njëanshëm.
Si duhet të jetë përbërja e grupit negociator?
Ekipi duhet të jetë përfaqësues shtetëror dhe jo i njëanshëm qeveritar, pavarësisht kush qeveris. Drafti ynë duhet të kalojë në parlament dhe te kryetari i shtetit, duke u bazuar te vendimet e Gjykatës Kushtetuese.
Përse Shqipëria nuk e shpall Gjirin e Sarandës Det Historik?
Është shumë vonë! Duhej bërë me një ligj të veçantë.
Ju faleminderit
/Gazeta Reforma.com/
