Koronavirusi vijon të përhapet me shpejtësi në gjithë botën duke u rritur kështu numri i të infektuarve por edhe viktimave e personave të shtruar në spitale.
Një valë e dytë ka prekur dhe rajonin tonë ku çdo ditë raportohen shifra alarmante të infektuarish dhe të vdekurish. Për këtë arsye Greqia ka vendosur të shtyjë përsëri masat bllokuese anti-covid, me Shqipërinë deri në datë 8 nëntor.
Sipas “Top Channel” masat do të vazhdojnë të jenë ashtu siç kanë qenë pra lejohet të kalojnë vetëm ata që janë shtetas grekë, ata që kanë leje qëndrimi në Greqi, punonjësit sezonalë dhe personeli diplomatik. Ndërsa ndalohen udhëtimet për qëllime turistike.
Hyrja në territorin grek apo dhe dalja prej tij, për rastet e referuara më lart, lejohet VETËM nga pikat kufitare të kontrollit të Kakavijës dhe të Kapshticës.
Τë gjithë ata që hyjnë në Greqi duhet të paraqesin:Testin negativ për COVID-19 (me metodën PCR), i kryer deri 72 orë para mbërritjes në pikën e kalimit kufitar, nga laboratorët publikë ose privatë të certifikuara në Shqipëri. (nuk vlen për shoferët e kamionëve që transportojnë mallra dhe fëmijët e lindur nga 2011 e tutje) Vërtetim diagnoze në anglisht. (në të cilën duhet të jenë të shënuara emri, mbiemri dhe numri i pasaportës / numri i kartës së identitetit të individit)Vërtetimin e plotësimit të formularit të posaçëm PLF (Passenger Locator Form), me kodin QR (në adresën elektronike https://travel.gov.gr )
Ndërkohë kujtojmë se prej 8 muajsh që nga fillimi i pandemisë është krijuar kaos me udhëtimet e qytetarëve jashtë vendit dhe kryesisht me ato drejt Greqisë pasi në pikat kufitare janë vendosur kuota për numrin e qytetarëve të lejohet të kalojnë kufirin.
Greqia ka një rritje të ndjeshme të rasteve me Covid-19. Tani çdo ditë raportohen mbi 800 raste në ditë, ndërsa të vdekurit nga covid kanë arritur 574.
