Fuat Vjerdha, kryetar i Gjykatës se Apelit Shkodër deklaron se u rikthye në detyrë në sajë të një peticioni me 6 mijë firma nga qytetarët.
Duke folur një ditë pas vendimit të Komisionit të Apelimit, gjyqtari deklaroi se në Gjykatën e Apelit në Shkodër nuk mjaftojnë gjyqtarët, prandaj do t’i kërkoj të hënën KLGJ-së plotësimin e stafit.
“Kuptohet që është një kënaqësi për mua që u riktheva në detyrën time. Është një kënaqësi e madhe duke qenë se jam i pari që konfirmohem në detyrë nga KPA. Me këtë rast nuk do të pushoj së përmenduri ndihmën që më kanë dhënë qytetarët e mi përmes nënshkrimit të një peticioni që unë e kam paraqitur pranë Kolegjit të Apelimit me të cilët kundërshtohet konkluzioni i KPA-së që unë kam cenuar besimin e publikut në sistemin e drejtësisë. Ishin 6244 shtetas më mbështetën me peticionin e tyre. Pavarësisht se KPA nuk e futi në rrethin e provave, unë kam bindjen se ai peticion ka bërë punën e vetë në mbështetjen e një vendimi për mua” – deklaroi Fuat Vjerdha.
Ai tha se të hënën do të kthehet menjëherë në punë.
“Jam i ndërgjegjshëm për punën e madhe që kam përpara por shpresoj që ky pushim i madh që unë kam bërë prej 16 muajsh do të më motivoj që unë mos të shoh më oraret e punës por të punoj sa më shumë. Në Gjykatën e Apelit të Shkodrës aktualisht janë 3 gjyqtarë plus 1 gjyqtar i komanduar për një vit. Janë 4 dhe me rikthimin tim në detyrë janë 5 gjyqtarë. Puna e parë që do të bëj të hënën, do i kërkoj KLGJ-së që të bëhet e mundur ardhja e një gjyqtari tjetër që të mundësohet formimi i dy trupave gjykues në gjykatën e apelit Shkodër për t’i shërbyer sa më mirë komunitetit të një qyteti dhe veriut të Shqipërisë” – shprehet gjyqtari.
Nuk kanë munguar edhe kritikat për procesin e vettingut.
“Vettingu në vetvete ka sjellë pasoja të paparashikueshme nga ana e ligjvënësve. Dikur isha dhe unë pjesë e tyre që u kthyen. Por nuk mendoja që do të ishte në këto nivele shkarkimi i gjyqtarëve. Pasojat janë të dukshme, kanë mbetur Gjykatat e Apelit me 1 os 2 trupa gjykues. Në gjykatën e Shkodër janë një numër dosjesh i konsiderueshëm. Nëse përpara 16 muajsh, kohëzgjatja e gjykimeve në Gjykatën e Apelit varionte nga një vit në 1 e gjysmë tani besoj se ka shkuar në 2 vite” – deklaroi Vjerdha.
Fuat Vjerdha është gjyqtari i parë që është kthyer në punë nga KPA.
/GazetaReforma.com/
