Pandemia e COVID-19 ka kushtëzuar shumë mënyrën dhe stilin e jetesës në gjithë botën dhe bashkë me të edhe sportin më të dashur për të gjithë, futbollin.
Kjo ka vënë në pikëpyetje dhe shumë aktivitete që do të mbaheshin gjatë këtij viti.
Në një intervistë për mediat spanjolle, presidenti i UEFA-s, Aleksander Ceferin pranoi se Europiani i 2021 nuk është në rrezik, por, ndoshta, formula shëtitëse, pra zhvillimi i ndeshjeve në shumë vende, do të shfuqizohet. “Ne jemi të sigurt se do të luhet, por ndoshta vetëm në një vend,” – rrëfeu kreu i UEFA-s.
Sa i përket formulës “Final Four” të Ligës së Kampionëve Ceferin theksoi:
“Është një opsion, por pas vitit 2024. Formati i vitit të kaluar u favorizua nga Koronavirusi, por ishte interesant. Një finale me tetë skuadra është e vështirë për shkak të kalendari, por një “Final Four”, me një javë futboll, do të ishte një ngjarje e shkëlqyeshme që mund të organizohej në qytete të mëdha. VAR? Ndihmon futbollin, por gjithashtu mund ta dëmtojë atë. Nuk ka kthim prapa, por ka shumë gjëra për t’u përmirësuar. “
