Ndërkohë që Gentian Malindi është në arrati, SPAK i jep edhe 3 muaj afat policisë që ta gjej të kërkuarin. Ai akuzohet në lidhje me 137 kg kokainë të kapura në portin e Durrësit.
SPAK i kërkoi policisë shqiptare të intensifikojë kërkimet për arrestimin e të akuzuarit Gentian Malindit. Ky i fundit dyshohet të jetë pritësi i lëndës narkotike në Durrës. Për të është caktuar “arrest me burg” në mungesë, ndërsa në qeli ndodhen Ardian Bega dhe Altin Myslihaka.
Kokaina vinte nga porti i Pireut në pako orizi. Greqisë po ashtu i është kërkuar që të intensifikojë hetimet për të zbuluar persona të tjerë të përfshirë në ngjarje.
Sasia prej 137 kg kokainë ishte nisur nga Ekuadori, do kalonte nëpër vendin tonë dhe destinacioni final ishte tregu europian.
Kokaina ishte fshehur në motorët e frigoriferëve në katër kontenierë me banane, të porositura nga një kompani shqiptare, e cila operon në treg nga viti 2011. Autoritetet greke informuan policinë shqiptare pas zbulimit të drogës dhe më pas kanë vendosur që ta zëvendësonin drogën me oriz, dhe brenda pakove të vendoseshin GPS.
Kontenierët me banane kaluan tranzit në portin e Pireut. Sipas burimeve nga grupi hetimorë asokohe u bë me dije se të dyshuarit kanë hapur vetëm kontenierin me targë 313 duke hequr me një kaçavidë pllakën metalike dhe duke marrë prej atyre disa pako me çantë dore. Pako të cilat në vend të 137 kg kokainë kishin 136 kg oriz e gips si dhe 1 kg kokainë.
Personi i dytë i arrestuar, Ardian Bega, oficer sigurie në portin e Durrësit pohoi se ishte kontaktuar nga Gentian Malindi që të merrte diçka në kontejnerët me banane, brenda të cilave kishte 137 kg kokainë. Po sipas Begës, pasi Malindi kishte pikasur se ishte në vëzhgim nga policia, e kishte hedhur drogën nga makina në zonën e Shkëmbit të Kavajës.
Gentian Malindi ka qenë edhe më herët i arrestuar dhe proceduar për trafikim të lëndëve narkotike. Ai është arrestuar më parë dhe për një sasi prej 500 kilogramë hashash, që ishin transportuar nga Lazarati në drejtim të Durrësit. Biznesmeni durrsak është ankuar më parë në media se kontrollet e shpeshta të bëra nga ana e policisë po i dëmtonin biznesin.
/GazetaReforma.com/
