Ministri për Rindërtimin, Arben Ahmetaj, shprehet gjithmonë pompoz për projektet që ka në letër, por kur vjen puna për t’i vënë në zbatim, është tjetër gjë.
Në fund të shtatorit, Ahmetaj u shpreh në emisionin ‘Real Story’, se banorët që u ishte dëmtuar pallati apo banesat në Kombinat, nga tërmeti i nëntorit, nuk do shpërnguleshin.
Ahmetaj tha se do të ndërtohen dy qendra të reja, njëra në Kombinat dhe tjetra te “5 Maji”, dhe se puna do të niste në 10 tetor.
Çfarë deklaronte Ahmetaj?
“Nuk do të ketë shpërngulje në Kombinat, do të ndërtohen dy qendra. Këto fillojnë më 10 tetor, hidhen themelet e pallateve te ‘5 Maji’, dhe pas 15 tetorit fillojnë themelet në Kombinat. Nga nesër fillon prishja te ‘5 Maji’ dhe më pas në Kombinat. Në datën që thashë do hedhim kazmën e parë të rindërtimeve, që do të kenë mbaruar maksimumi deri në maj të vitit tjetër. Qytetarët që do të marrin apartamente atje do të kenë një letër me vlerë me firmë nga kryeministri, ku do të kenë të përcaktuar edhe hyrjen. Këto letra do të kenë vlerë monetare, do iu jepen qytetarëve për hyrjet, dhe do jetë garanci dhe për legalizimet më vonë”, tha Ahmetaj.
Si qëndron realiteti?
Por, data sot shënon 16 tetor, dhe asnjë kantier nuk është hapur. Kryeministri dhe Ministri nuk i lënë këto raste pa reklamuar në ERTV-në e tyre, për të treguar nisjen e punimeve. Ende sot, punimet nuk kanë nisur për këto banesa të reja, as në Kombinat, e as në lagjen ‘5 maji’.
Po bëhet gati një vit nga tërmeti i nëntorit, dhe ende nuk kanë nisur punimet për ndërtimet e reja. Me këto vonesa, edhe maji i vitit 2021, i lënë si afat për përfundimin e këtyre shtëpive, me siguri nuk do të arrihet, dhe qytetarët e dëmtuar për fat të keq do u duhet të presin akoma.
/GazetaReforma.com/
