Gjermania ka regjistruar një shifër rekorde të rasteve ditore me Covid-19 . Vetëm gjatë 24 orëve të fundit në vend janë konfirmuar 6,638 të infektuar me koronavirus. Kjo është shifra më e lartë ditore që nga fillimi i pandemisë.
Si pasojë e rritjes së numrit të të infektuarve kancelaria gjermane, Angela Merkel mblodhi udhëheqësit e 16 shteteve federale të Gjermanisë për të diskutuar lidhur me shtrëngimin e masave kufizuese me qëllim frenimin e përhapjes së virusit.
Merkel njoftoi masa të reja kufizuese sa i përket tubimeve si dhe mbajtjen e maskës mbrojtëse në vende të mbipopulluara.
Sipas masave të reja, nëse një zonë regjistron më shumë se 35 infeksione të reja për 100,000 njerëz gjatë një jave, maskat do të bëhen të detyrueshme në të gjitha vendet ku njerëzit kanë kontakt të ngushtë.
Numri i njerëzve që lejohen të mblidhen gjithashtu do të jetë i kufizuar në 25 në vende publike dhe 15 në hapësira private.
“Gjermania nuk mund të përballojë një izolim të dytë”, paralajmëroi Merkel, duke theksuar se “ajo që ne do të bëjmë në javët e ardhshme do të përcaktojë se si ta kapërcejmë këtë pandemi” ndërsa u bëri thirrje të rinjve të ndalojnë festat, çka përbën burim të transmetimit të sëmundjes”
Numri i përgjithshëm i të infektuarve me Covid-19 në Gjermani ka tejkaluar 341 mijë persona ndërsa në total mbi 9 mijë njerëz kanë humbur jetën.
\Gazetareforma.al\
