Policia e shtetit në kuadër të Opercaionit Forca e Ligjit ka njoftuar se ka dërguar formularët për deklarimin e pasurisë ndaj 4 personave në qytetin e Beratit të cilët janë dënuar për veprat penale “Vrasje me paramendim” dhe “Vjedhje me armë”.
Këta persona do të duhet tu përgjigjen me shkrim të gjithë pyetjeve në formularët e dërguar nga OFL brenda 48 orëve, më pas do i dërgohen Prokurorisë së Posacme për verifikime të mëtejshme.
Sipas OFL formulari u është dërguar Besnik Lamçe, Qemal Kaçi, Ermal Lila (Reçi), Vehap Shehu.
Njoftimi i policisë
OFL, 14 tetor
Vijon pa ndërprerë Operacioni Forca e Ligjit, në zbatim të detyrave të përcaktuara në Aktin Normativ të datës 31 janar 2020.
Në kuadër të zbatimit të Ligjit Special për masat pasurore ndaj individëve të dënuar apo akuzuar për krim të organizuar apo krime të rënda, OFL i ka nisur kërkesat me shkrim për vetëdeklarimin e burimeve të pasurisë, shtetasve:
B. L., banues në Tiranë, i dënuar për kryerjen e veprave penale “Vrasja me paramendim”, e kryer në bashkëpunim dhe “Vjedhja me armë”;
Q. K., banues në Burrel, i dënuar për veprën penale “Vrasja me paramendim”;
E. L. (R.), banues në Peshkopi, i dënuar për veprën penale “Vrasja në rrethana të tjera cilësuese” (vrasja e funksionarëve publikë);
V. Sh., banues në Fushë Bulqizë, Dibër, i dënuar për veprën penale “Vrasja me paramendim”, e mbetur në tentativë.
Këta individë, si subjekt i Ligjit Special, duhet t’u përgjigjen me shkrim, brenda 48 orësh, të gjitha pyetjeve të OFL-së dhe më pas, përgjigjet e marra do t’i dërgohen SPAK-ut, për veprime të mëtejshme.
OFL është në veprim të pandërprerë dhe në kryerje të veprimeve komplekse për vendosjen e sekuestrove emergjente mbi pasuritë e dyshuara të përfituara nga krimi, si dhe për dërgimin e formularëve të vetëdeklarimit të gjithë personave që janë subjekt i Ligjit Special.
OFL do të informojë publikun në vijimësi për të gjitha nismat procedurale dhe operacionet ekzekutive që do të kryejë.
