Natyrë e virgjër, pyje ahu dhe një liqen piktoresk. Këto janë vetëm disa nga veçoritë e Fushë-Studën, një nga atraksionet më të bukura në Parkun Kombëtar Shebenik-Jabllanicë, që gjendet në kufirin mes zonave të Librazhdit dhe Dibrës.
Megjithatë, pas rrugës së asfaltuar që nis në Librazhd, gjithçka vështirësohet, dhe në Shkallën e Lunikut, ajo bëhet thuajse e pakalueshme.
Edhe pse mikrpitja e banorëve është e jashtëzakonshme, të paktë janë ata që preferojnë të kthehen aty, prej rrugës së keqe.
Infrastruktura mbetet problemi kryesor i turizmit
Rrjeshjet e vjeshtës e kanë vështirësuar edhe më shumë rrugëtimin për në Fushë Studën, ndërsa çakulli ka dalë nga traseja dhe kanale të mëdha janë hapur në rrugë. Kjo e ka bërë lëvizjen me automjete të vogla të pamundur.
Kur mbërrin atje, fshati me lartësi 1150 metra mbi nivelin e detit të shpërblen me pamjen e bukur. Brenda pllajës që gjendet mes malesh, vizitorët gjejnë mbi të gjitha ajrin e pastër dhe të shëndetshëm.
Banorët e zonës mburren me vendlindjen e tyre, teksa ajo është një nga zonat më të mira në Shqipëri për kurimin e sëmundjeve të astmës.
Deri në fillim të viteve 1990, ky fshat i përkiste rrethit të Dibrës dhe një pjesë e banorëve vazhdojnë të jenë më të lidhur me këtë trevë.
Rruga që vjen nga Librazhdi, vijon më tej drejt Shupenzës dhe megjithëse është vetëm një degëzim, vendalinjtë e quajnë “Rruga e Kombit”. Por ata nuk këshillojnë që kthimi drejt Durrësit të bëhet nga krahu i Dibrës dhe Bulqizës.
Fondet nga Europianët
Vetëm pak ditë më parë, Gazeta Reforma tregoi se si fondet nga BE dhe BERZH vazhdojnë të vijnë, kryesisht për infrastrukturën dhe turizmin.
BERZH do të sigurojë një hua prej 60 milionë euro për financimin e infrastrukturës së turizmit, si rrugë, ujëra dhe kanalizime dhe infrastrukturës bashkiake me një fokus të veçantë në bashkitë Berat, Korçë, Fier dhe Shkodër.
BE do të sigurojë gjithashtu 40 milionë euro në grante përmes “Instrumentit të saj për Asistencë të Para-Antarësimit”, për asistencë teknike dhe investime.
Pavarësisht këtyre fondeve që priten të vijnë, vetë qeveria shqiptare as nuk i ka hedhur sytë nga ky destinacion turistik, për të zbutur sado pak vështirësitë e arritjes atje, që të fillojë të vizitohet në mënyrë më të zgjeruar nga turistët, e për të kulmuar me shtrimin e rrugës dhe gjithë infrastrukturës së nevojshme që do të kenë nevojë banorët vendas për të ofruar shërbimet.
/Burimi: Reporter/GazetaReforma.com/
