Rama rehabiliton ministrin e Turizmit, Blendi Klosi për gafën me “valët që përhapin virusin”. Me seriozitet, para gazetarëve, kryeministri kërkon të zbatohet “këshilla” e Blendi Klosit.
“Po sikur të ulej pak zëri nëpër studio, duke pasur parasysh edhe këshillën e ministrit të Mjedisit për punën e valëve, do të ishte një ndihmë e madhe”, tha Rama.
Ministri i Turizmit, Blendi Klosi, në një intervistë televizive, ka dhënë një argument të ri se përse nuk lejohet muzika në kafene. Sipas tij, valët përhapin virusin, një zbulim i rrallë, që nuk ishte dëgjuar më parë, por që ministri e tha me siguri, sipas së cilit është e vërtetuar shkencërisht.
“Kjo është e vërtetuar, janë zonat ku virusi hapet më shumë se në çdo vend tjetër, pasi valët e muzikës janë ato që përçojnë virusin, në distancat që jemi ne të dy mund të mos ketë përçim, në distancat ku ka valë muzike përhapja e virusit është më e madhe. Dhe në ambientet me muzikë sidomos ku përdoret pije alkoolike, njerëzit duke qenë më pranë njëri tjetrit, lëshohen më shumë”, ky ishte budallallëku ministror që Rama e mori në mbrojtje.
Kryeministri ua dha këshillën gazetarëve me nëntekstin, mos u merrni me ministrin tim, edhe kur ai këput mufka.
Është në praktikën e tij që të marrë në mbrojtje ministrat dhe politikanët e tij të afërt duke iu bërë presion gazetarëve që të censurojnë këto pjesë.
Një ditë më parë, pas gafës së Elisa Spiropalit në emisionin Opinion, ku kritikonte Metën pse dekoron dëshmorët, Rama doli publikisht dhe këshilloi mjaft u morët me Elisën.
