154 pallate dhe shtëpi individuale në Vorë do të rikonstruktohen pasi mbetën të dëmtuara nga tërmeti i 26 nëntorit.
35.5 mln lekë do përdoren nga fondi për ‘Grande për rikonstruksione’. Financimi do të jetë për objektet e klasifikuara me shkallë dëmtueshmërie DS1-DS3 që nuk duhen rindërtuar nga e para, por kanë nevojë për rikonstruksione.
Fondi me vlerë 6,8 mln lekë do të përdoret për rikonstruksionin e 68 objekteve me klasifikim dëmtueshmërie DS1. Për 57 objekte me shkallë dëmtimi DS2 do të përdoren 14,2 mln lekë dhe 14,5 mln lekë do të përdoren për riparimin e 29 objekteve të klasifikuara DS3.
Ndërkohë, nga grandet për rikonstruksionin, do përdoren edhe 217.9 mln lekë, për 36 pallate në qytetin e Lezhës.
Sakaq është miratuar edhe përdorimi i fondit të rindërtimit me vlerë rreth 92 mln lekë për shpronësimin e pronarëve të pasurive të paluajtshme, që preken nga projekti i rindërtimit, që do të realizohet në njësinë administrative Bubq, pjesë e bashkisë të Krujë, si zonë e shpallur për zhvillim të detyruar.
Sipas të dhënave të Ministrisë të Rindërtimit, pas inspektimit rezultoi se në rang vendi janë për t’u shembur 115 pallate, ku numri më i lartë rezulton në Shijak në 30 pallate, 22 në Kurbin, 5 në Durrës, 8 në Kamëz, 10 në Kavajë, 19 në Vorë, 16 në Krujë, 4 në Lezhë dhe 1 në Mirditë. Në total në të gjithë vendin për rikonstruksion janë 242 pallate.
Numri më i lartë i shembjeve është për shtëpitë individuale apo siç njihen ndryshe shtëpitë private. Referuar shifrave të Ministrisë së Rindërtimit numri i tyre llogaritet në 1,523 objekte. Numri më i lartë i tyre është në Krujë në 814 dhe në Vorë në 369 shtëpi. Në Shijak do të shemben 99 shtëpi individuale dhe në Kamëz 81. Për t’u riparuar janë 607 shtëpi individuale.
Durrësi ishte qyteti më shumë i prekur nga tërmeti, ku rezultojnë të dëmtuara 37,179 banesa dhe 343 biznese, duke përfshirë ato të tregtisë, industrisë, prodhimit dhe magazinat. Numri i hoteleve të dëmtuara llogaritet në 52 njësi. Në Tiranë u dëmtuan 35,085 banesa dhe 60 biznese. Në kryeqytetet nuk pati dëme në strukturat akomoduese, si hotele.
/Burimi: Monitor/GazetaReforma.com/
