Policia e Shkodrës ka shoqëruar mbrëmjen e sotme në cilësinë e dëshmitarit, babanë e Danjel Pepajt, autorit të dyshuar të vrasjes makabre të dy të rinjve, Vilson Çutaj e Klement Pepaj, pas sherrit për kanabisin.
Mësohet se është shoqëruar në komisariat Rrok Pepaj, pas gjetjes së dy trupave të pajetë në Vrith të Malësisë së Madhe. Por, babai i Danjel Pepajt mund të arrestohet nga policia për akuzën e moskallëzimit të krimit.
Ndërkohë zbulohet se tek parcela me kanabis në zonën malore të Vrithit i ka çuar pikërisht vetë babai i Danjel Pepajt, Rrok Pepaj i cili mesa duket kishte dijeni për kanabisin dhe konfliktin mes të rinjve.
Vilson Cutaj dhe Klement Pepaj u gjetën të pajetë mesditën e sotme në një zonë të pyllëzuar të Rrencit, që ndodhet rreth 3 orë në këmbë nga fshati Vrith, në Malësi të Madhe. Dy trupat u gjetën disa metra larg njëri-tjetrit të ekzekutuar me kallashnikov.
