Rreth dy milionë pasaporta kanë skaduar ose skadojnë deri në fund të vitit dhe njerëzve nuk iu ofrua ky shërbim, gjoja për shkak të pandemisë. Ky është skandali që është krijuar nga mosfunksionimi i procesit në zyrat e koncesionarit “Aleat”, që po e fsheh ministri Lleshaj.
Me hashtagun “AplikoSotIDkartë” ministri i Brendshëm Lleshaj shpërndan njoftimin se kartat ID skadojnë në 31 dhjetor 2020. Pra, vendimi i marrë për shkak të pandemisë për shtyrjen e afatit përsëritet me efektin e një reklame. Presioni rrezikon që të krijojë një kaos me kartat e identitetit.
Ministri duket si një agjent marketingu i kompanisë “Aleat”, që ka koncesionin e prodhimit të këtyre dokumenteve. Por qëllimi mund të jetë krijimi i sa më shumë telasheve para votimit të zgjedhjeve të 25 prillit 2021.
Njoftimi
“Në 31 dhjetor 2020 skadojnë një numër i lartë kartash identiteti të shtetasve shqiptarë. Për shkak të pandemisë, vlefshmëria e ID kartave që skadonin përgjatë vitit 2020, u shty deri në datën 31 dhjetor. Kjo pritet të sjellë një fluks aplikimesh javët e fundit të vitit. Ndaj, aplikoni pa humbur kohë, për të evituar radhët!!” shkruan ministri i Brendshëm në Facebook.
Një numër i madh shërbimesh tashmë kryhen online, nëpërmjet kartës së identitetit. Karta e identitet ju shërben për: Veprime administrative, financiare, kalim në Pika Kufitare, kusht për rinovimin e pasaportës. Por mbi të gjitha, pa kartë identiteti nuk mund të votosh.
Skadimi i ID kartës e bën të pamundur marrjen e shërbimeve për qytetarët, nga fillimi i vitit të ardhshëm.
“Riaplikimi për ID kartë mund të bëhet në çdo zyrë, pavarësisht vendbanimit”, shkruan Lleshi, duke vazhduar njoftimin e tij se, shërbimi i pajisjes me dokumente identiteti është i pranishëm edhe në Ambasada e Konsullata shqiptare në 6 shtete: në Greqi, Itali, Belgjikë, Gjermani, Britania e Madhe dhe SHBA.
Po të kemi parasysh se këtë çështje e ka sqaruar kryeministri i cili ka njftuar se rezervimi për kartat bëhet online e-Albania, del se Lleshi ka marrë urdhër ta bëjë kaos çështjen e kartave të identitetit para zgjedhjeve.
“Apliko sot, të mos përballesh me surpriza të pakëndshme nesër!” paralajmëron Lleshi. Çfarë mund të ndodhë?
Problemi është i vjetër
Si mundet që rreth 2 milionë karta identiteti që kanë skaduar ose priten të skadojnë të nxirren për dy muaj? Ishte i njëjti ministër që sorollati njerëzit në kohën e pandemisë për pajisjen me karta të identitetit.
Në prill, Sandër Lleshaj bënte me dije se me mijëra karta janë prodhuar, e për pasojë do të duhet të nisë shpërndarja e tyre. Qytetarët do të njoftohen nga zyrat përkatëse, ku do të lihet orari për të marrë kartën e ID ose pasaportë.
“Dihet që për arsye të pandemisë, janë ndaluar veprimtaritë e zyrave të aplikimit për pasaporta dhe karta identiteti, por ndërkohë një numër i madh kartash ID dhe pasaportash janë prodhuar dhe ne do të marrim masa që sipas një skeme të caktuar dhe shumë të sigurt, të mundësojmë që këto të shpërndahen. Për këtë arsye zyrat përkatëse që janë përgjegjëse për shpërndarjen e kartave ID dhe pasaportave dhe bëhet fjalë për disa mijëra syresh, do të fillojmë nga nesër që të thërrasim qytetarët nominalisht, për të lënë takime për të marrë në dorëzim kartat apo pasaportat”, tha Lleshaj.
Deri tani qytetarët nuk kanë arritur ta zgjidhin këtë problerm sepse radha është e madhe. Një vit më parë, në këtë kohë opozita thoshte se po skadon afati i kartës së identitetit për 1.4 milionë shqiptarë dhe kjo do të bëhej pengesë për zgjedhjet. Sot, i njëjti problem është shqetësues.
Sinjalet e para të manipulimeve që po bën Ministria e Brendshme kanë dalë me ndryshimin e adresave pa njoftuar qytetarët. “Nëse doni të bëni kallëzime, shkoni në prokurori”, reagoi ministri me arrogancë. Edhe për skandalin e BMW-së kështu u soll, duke heshtur para publikut.
/Gazeta Reforma/
