Një ngjarje e rëndë ka ndodhur në familjen Qafleshi në Prizren të Kosovës.
Brenda tri ditëve në këtë familje kanë humbur jetën si pasojë e koronavirusit dy vëllezërit Shemsedin 57 vjeç dhe Avdurrahim Qafleshi 60 vjeç, nga Dragashi.
Të dy ishin duke u trajtuar në Spitalin Rajonal të Prizrenit. Kryetari i Dragashit, Shaban Shabani, ka thënë se vdekja e vëllezërve Qafleshi është humbje e madhe.
‘Para 3 ditësh ka ndërruar jetë njëri prej vëllezërve, tani pas dy ditësh vëllai tjetër. Ata kanë qenë duke u trajtuar në Spitalin Rajonal të Prizrenit, fatkeqësisht nuk e kanë përballu luftën me koronavirusin’, tha Shabani.
“Me pikëllim të thellë e morëm lajmin e kobshëm për ndarjen e parakohshme nga jeta të vëllezërve nga Bellobradi, Shemsedin dhe Avdurrahim Qafleshi të prekur nga COVID-19. Ngushëllime të sinqerta familjes, miqve të të ndjerve, shokëve dhe gjithë qytetarëve. Ju qoftë i lehtë dheu i Kosovës”, thuhet në telegram ngushëllimin e tyre.
Ndërkohë ditën e sotme Instituti i Shëndetit Publik në Kosovë njoftoi se numri total i rasteve pozitive është 15,938 raste nga 71,865 persona të dyshimtë në virusin SARS-CoV-2 dhe 638 raste të vdekjes.
Ndërsa numri i përgjithshëm i të shëruarve deri më sot është 14,143 raste, kurse numri i rasteve aktive është 1,157.
