Nuk ka asnjë surprizë në lëvizjet e Erjon Veliajt që po shfaqet ditët e fundit në krah të disa artistëve që i rreshton si fansa të PS-së. Kjo është ajo që ky di të bëjë, përdor pushtetin, fondet e bashkisë, për të blerë imazhin e tyre.
Për herë të fundit ka prezantuar si prurje të re në PS, Kastro Zison, një aktor dhe këngëtar. Në rrjetet sociale është shfaqur me Zison, mik i vjetër i Ajola Xoxes. Pak ditë më parë, krah tij u shfaq Valbona Selimllari, Landi Hysa apo Vikena Kamenica.
Artistët i mirëkuptojmë se gjenden në situatë të vështirë për shkak të pandemisë, prandaj detyrohen të pranojnë politikanët në krah të tyre.
Një projekt gjatë verës, i Bashkisë së Tiranës, për promovimin e Turizmit mblodhi disa artistët të tjerë, të cilët janë me fat të marrin ndonjë fond në këtë kohë kur qeveria ka mbyllur çdo aktivitet artistik dhe kulturor.
“Jam superkrenar për 8 artistë të mrekullueshëm dhe grupin e instrumentistëve, njerëz që e duan të bukurën, teksa promovojmë 8 vende shumë të bukura në Tiranë.”, tha Veliaj. Ndërsa artisja e njohur, Eneida Tarifa shprehu mirënjohjen kryebashkiakut Veliaj për këtë nismë për promovimin e 8 vendeve të mrekullueshme në kryeqytet.
Gjatë një takimi të zhvilluar në njësinë 4 në Tiranë, kryebashkiaku Erjon Veliaj ka prezantuar mbështetësit më të rinj të partisë socialiste.
Në përgatitje të fushatës elektorale të Partisë Socialiste për zgjedhjet e 25 prillit, krah Veliajt dhe Sadri Abazit, është shfaqur këngëtari Kastro Zizo i cili tashmë bën fushatë për Partinë Socialiste. Në fund Ziso i dhuroi Lali Erit një çantë shpine.
“Edhe unë dua të jem brenda njerëzve që janë po aq dinamik sa unë. Suporti im është maksimal dhe jo vetëm. Shumë nga ata njerëz në një projekt artistik që jam suportuar, kishin bindje të djathta. Kur secili është ndjerë i ngopur, ka reflektuar me veten, ore dale, këtë që kisha nevojë, ky po ma jep edhe pse s’është e partisë time. Suporti është maksimal. Lal, ti e di që jam njeri i surprizave, është kollaj të bësh biznes në Shqipëri. Unë arrita që të kem brandin tim të çantave, Lali kjo është një dhuratë për ty. Faleminderit shumë dhe fitore!“, tha ndër të tjera Kastro Ziso.
Në fakt, këtë gjë e bënë të dyja partitë edhe me çështjen e Teatrit kombëtar që u në fund u prish nga fadromat. Artistët u ndanë më dysh, ca me PD -në dhe ca me Erjon Veliajn. Nuk dihet nëse, Veliaj do ta nxjerrë në fushatë Robert Ndrenikën, por të rinjtë si Zisoja, tashmë janë rreshtuar.
