Ashtu si kryeministri Rama, edhe kryetari i Partisë Demokratike, Lulzim Basha, u kujtua vetëm ne ditën e 9-të të grevës së naftëtarëve.
Basha ishte sot në ambientet ku po mbahet greva e naftëtarëve të Ballshit, ku u shpreh se naftëtarët dhe minatorët vazhdojnë të jenë klasa më e shtypur në Shqipëri.
Edhe pse kalvari i vuajtjeve për naftëtarët ka nisur që në kohën e PD me privatizimin e kompanisë, Basha bën politikë me këtë situatë të vështirë të tyre. Basha shprehet se sipas tij, zgjidhja për naftëtarët do vijë vetëm pas 25 prillit.
“Këtë realitet e kam shumë parasysh. E gjitha është produkt i një serie aferash korruptive. Zgjidhjen do e marrë përsipër shteti. Vendim-marrja për disa muaj është e dikujt tjetër. Zgjidhja do të vijë pas 25 prilli”, tha Basha.
Lulzim Basha theksoi se pamja që shikon, me grevistët të shtrirë në Ballsh e trishton, duke nënvizuar se Shqipëria është një vend i bukur, por i vjedhur.
“Kjo pamje më trishton jashtë mase. Siç jenii shtrirë ju këtu, është shtrirë kështu gjithë Shqipëria. Nuk mban më që të vjedhësh çdo gjë e të lësh njerëzish kështu. Nuk ia vlen të vetë-sakrifikohesh për të. Unë fjalën kam sot, ndërsa kur të fitojmë, do të bëjmë realitet ato që po premtoj”, deklaroi Basha.
/GazetaReforma.com/
