Shqipëria dhe Armenia nuk do të kenë mundësinë të ndeshen kundra njëra- tjetrës pasnesër në futboll.
Lufta mes Armenisë dhe Azerbajxhanit, me sa duket ka sjellë edhe anulimin e ndeshjes miqësore me Shqipërisë.
Ndeshja Shqipëri-Armeni ishte parashikuar të luhej më 7 tetor në Jerevan.
Federata Shqiptare e Futbollit në një njoftim për mediat bën me dije, se vendimi është marrë për shkak të trazirave në Armeni.
NJOFTIMI I PLOTË:
Anulohet miqësorja Armeni-Shqipëri, që ishte programuar për t’u luajtur më datë 7 tetor në Jerevan. Zyra e shtypit në FSHF bën me dije se është marrë vendimi që ndeshja të mos luhet, për shkak të situatës së rënduar dhe trazirave që po ndodhin aktualisht në Armeni.
Ndërkaq, ekipi kombëtar shqiptar do të vazhdojë normalisht përgatitjet në Tiranë për dy ndeshjet zyrtare të tetorit në Nations League ndaj Kazakistanit (11 tetor) dhe Lituanisë (14 tetor). Pritet që grupi të kompletohet sot e nesër dhe të vijojë i plotë seancat stërvitore në kuadër të dy sfidave të radhës në transfertë.
Konflikti midis dy kombeve u intensifikua dje, pasi Forcat e Armatosura armene goditën Terterin e Goradizin, në rrethin Fizuli. Forcat armene dhe azere kanë treguar pak gatishmëri për t’i ndaluar luftimet që shpërthyen në 27 shtator.
Më shumë se 100 persona, përfshirë dhe mjaft civilë kanë mbetur viktima të përleshjeve të rënda.
Zyrtarisht pjesë e Azerbajxhanit, Nagorni-Karabak qeveriset nga armenët etnikë, e për këtë rajon, dy ish-republikat sovjetike, kanë zhvilluar një luftë në vitet 1988-1994, ku vdiqën 30.000 vetë.
/GazetaReforma.com/
