Një ditë para votimit të Ndryshimeve në Kodin Zgjedhor në Kuvend, përfaqësuesit e Opozitës në Këshillin Politik Oerd Bylykbashi së bashku me përfaqësuesin e LSI, Petrit Vasilin kanë mbajturnjë konferencë për shtyp nga Selia Blu.
Bylykbashi tha se me këtë akt, Rama ka thyer çdo marrëveshje të mëparshme dhe konsensus, dhe, sipas tij, e bën këtë për të reduktuar humbjen më 25 prill.
Më tej Bylybashi shtoi se kreu i qeverisë mund të përdorë çdo truk që të dojë, por kjo nuk “e ndal dot fitoren e opozitës më 25 prill të 2021”.
“Me votimin e nesërm, të bazuar mbi miratimin e njëanshëm, Rama shkatërron marrëveshjen e 14 janarit, konsensusin e Këshillit Politik dhe 5 qershorin. Duke ndërhyrë drejtpërdrejt në elementë të 5 qershorit. U miratuan më 30 qershori, dhe parlamenti i bëri ligj më 23 korrik.
Ndërhyrjet e nesërme do të krijojnë konfuzion, si do të funksionojë sistemi zgjedhor. Bëhet se si Rama të reduktojë humbjen e tij në zgjedhjet e ardhshme. Asnjë truk nuk do të ndalë atë që më 25 prill do te jetë fundi politik, dhe fitoren e opozitës.
Në të gjithë përpjekjen e tij për të thënë që procesi i Reformës që po e përmbyll në mënyrë të njëanshme, është përpjekje për të bërë Këshillin Politik për njëanshmëri të ndryshimeve kushtetuese, po heq mundësinë që partitë të garojnë në koalicion që e mund në 12 qarqe,” u shpreh përfaqësuesi i PD në Këshillin Politik.
Ndërkohë Petrit Vasili është shprehur se me votimin e ndryshimit të Kodit Zgjedhor ditën e nesërme do të “varroset” integrimi europian.
“Votimi i nesërm për të gjithë shqiptarët është prova e fundit të paralajmëruar të Edi Ramës sepse çdo akt i nesërm është përgjegjësi shumë e rëndë nga e cila Rama nuk mund të shmanget dot, pasi në mënyrë të vullnetshme varros integrimin europian të vendit. Me votimin e nesërm hapje negociatash nuk ka. Sot integrimi europian ka vetëm një armik, Rilindjen dhe Edi Ramën. Agjenda e Edi Ramës është anti0-perëndim dhe anti-NATO dhe është drejtuar drejt realiteteve informale dhe të ngarkuara me pisllëk politik. Është e qartë për shqiptarët se cili pengon dhe izolon vendin.
Listat janë më të mbyllura se më parë. Rama bën sikur hap listat dhe thotë që koalicione do të ketë por do t’i bëjë siç do ai. Shqiptarët e kanë të qartë, që nga ekonomia familjare te ekonomia e vendit që ka një borxh publik që shkon në 100%”, tha Vasili.
