Në kulmin e debatit mbarë-botëror për efektshmërinë ose jo të një vaksine kundër koronavirusit, si dhe kur e gjithë bota po proteston për mosbërjen e vaksinave me detyrim, duket se Shqipëria e ka gjetur një “zgjidhje”.
Kjo “zgjidhje” duket se vendit tonë do t’i vijë nga Greqia, e cila, sipas kryeministrit të Maqedonisë së Veriut, Zoran Zaev, do ta përfitojë falas ashtu si edhe shteti i tij.
Këtë gjë Zaev e ka zbuluar sot pas një takimi që pati dje në Athinë me kryeministrin e Greqisë, Mitsotakis.
Kryeministri maqedonas, Zaev, ka zbuluar se homologu i tij grek, Kyriakos Mitsotakis, ka qenë i gatshëm për të ofruar vaksinën e COVID-19 tek Shqipëria dhe Maqedonia e Veriut.
Në fund të këtij viti, Greqia nëpërmjet BE do të marrë vaksinën ndaj COVID-19 e krijuar nga Universiteti i Oksfordit, por prodhuar nga gjigandi farmaceutik “AstraZeneca”.
Por tashmë BE ka dhënë mundësinë që vendet partnere, jo në BE mund ta përfitojnë në rast se u jepet si donacion nga vendet e BE, u shitet prej tyre, ose ua jep vetë OBSH.
Në këtë rast, Zaev thotë se, Greqia do ua japë Shqipërisë dhe Maqedonisë së Veriut, teksa kujtojmë se, kjo e fundit e ka siguruar edhe nga Polonia një garanci.
“Kryeministri grek Kyriakos Mitsotakis u tregua i gatshëm që Greqi, si vend anëtar i BE të ofrojë vaksinën kundër covid-19 Shqipërisë dhe Maqedonisë Veriore, pasi vaksina do arrijë fillimisht në vendet anëtare e më pas tek kandidatët për integrim. Për mua, kjo deklaratë është një provë e miqësisë së mirë”, – tha Zaev.
/GazetaReforma.com/
