I mbijetuari nga atentati me tritol në Tiranë para tre ditësh ka folur sot nga Spitali i Traumës për efektivët e policisë dhe ka thënë se nuk është në hasmëri dhe nuk ka konflikte me asnjë person.
Gjini është shprehur se ditën e atentatit nuk ka vënë re asgjë të dyshimtë dhe se nuk ruhej nga ndokush pasi nuk ndihej i kërcënuar, ndërkohë ditën e atentatit ka qenë në Tiranë ku ka zhvilluar takime të ndryshme me shok e miq.
Më tej Gjini i ka treguar policisë edhe lokalet dhe akset rrugore ku ka lëvizur dhe kryer takimet, ndërsa grupi hetimor ka vënë nën monitorim këto hapësira me shpresën se mund të gjejë ndonjë indicie apo diçka të dyshimtë që mund t’i çojë drejt kapjes së autorëve të ngjarjes.
Prokuroria ka sekuestruar të gjitha filmimet e bëra nga kamerat e sigurisë në zonat ku ka lëvizur Gjini, për të parë nëse ka pasur ndonjë person apo automjet që e ka gjurmuar nga pas, pas se t’i bëhej atentati me tritol në makinë me “ML” me të cilën udhëtonte, që ishte në pronësi të kushëririt të tij.
“Nuk kam asnjë hasmëri dhe konflikte me persona të tjerë. Më është vrarë vëllai por nuk mbaj përgjegjësi për veprimet e tij. Gjatë gjithë kohës nuk kam vënë re asnjë detaj të dyshimtë. Gjithmonë lëvizja i vetëm dhe nuk kisha frikë që të ruhesha. Makinën ia merrja shpesh kushëririt, pasi më të kam marrëdhënie të mira”, është shprehur ai para oficerëve.
Ndërkohë kujtojmë se atentati ndodhi në rrugën “Irfan Tomini” në Tiranë ose siç njihet ndryshe “Ura e Nisharakut”.
Shënjestra dhe personi që ka mbetur i plagosur në atentatin me tritol mbrëmjen e kaluar në Tiranë, është Preng Gjini i cili shërbyer si efektiv pranë Gardës së Republikës. Ai nuk është një emër i panjohur, pasi ai është një person me precedent penalë, i përfshirë në aktivitetet e jashtëligjshme të Gasper Reçit, i cili u ekzekutua në Romë, në muajin prill të vitit 2017.
