Ngjarjet e fundit kriminale në vend i kanë detyruara forcat RENEA, Shqiponja dhe Policinë Kriminale që të zhvillojnë operacione blic në disa qytete me rrezikshmëri të lartë kriminaliteti.
Kruja, Tirana, Elbasani, Korça dhe Berati janë pesë qytetet kryesore ku do të zhvillohen opercionet për të bërë të mundur arrestimin e të rrezikshmëve, të të shumëkërkuarve, pikasjen e të armatosurve dhe të atyre që lëvizin duke shpërndarë lëndë narkotike.
Kruja ishte qyteti i parë për të vijuar kontrollet dhe ende nuk ka informacione nese ka patur të shoqëruar nga kontrollet e ushtruara. Aty ndodhi edhe një shkëmbim me armë zjarri në zonën e Herrit në Malësinë e Krujës. Shkëmbimi ka ndodhur mes efektivëve të Anti-drogës dhe kultivuesve të kanabisit në këtë zonë. Ngjarja ka ndodhur teksa efektivët ishin në terren duke kontrolluar për drogë në kufirin ndarës Krujë-Tiranë.
Ndërkohë pasditen e sotme forcat RENEA shkuan në Elbasan, dhe shoqëruan gjashtë persona nga dy familje disa orë pas vrasjes së vëllait të Talo Çelës, Bujari Cela. Kontrollet e efektivëve janë bërë në disa shtëpi, në fshatin Broshkë, Përparim dhe Mëngël. Identetet e të shoqëruarve nuk bëhen me dije, por dyshohet se ata kanë lidhje apo dijeni për ekzekutimin dhe autorët e vrasjes së Çelës.
Gjatë kontrolleve në disa pika kyçe të qytetit mësohet se forca të shumta dhe automjete të policisë janë vendosur në ndjekje të një makine, e cila nuk i është bindur urdhrit të patrullës për të ndaluar duke u larguar me shpejtësi.
Forcat të shumta policie kanë mbërritur edhe në qytetin juglindor të Shqipërisë, në Korçë. Mësohet se uniformat blu kanë ngritur pika kontrolli në disa akse rrugore në Korçë dhe kanë vijuar me kontrollet në shumë banesa. Në fokus të këtij operacioni janë gjetja e personave të shpallur në kërkim, asgjësimi i armëve pa leje dhe asgjësimi i lëndëve narkotike.
Në qendër të Beratit por edhe në të gjitha pikat hyrëse e dalëse të tij janë vendosur postblloqe me forca të shumta policore, pjesë e të cilëve janë bërë të gjithë sektorët e kësaj drejtorie, duke filluar që nga inspektorët e krimeve, forcat Shqiponja e deri tek ata të qarkullimit rrugor.
Ndërkohë kujtojmë se gjatë ditëve të fundit në vendin tonë kanë ndodhur shumë ngjarje kriminale(përmendim këtu vrasjen e Bujar Celës, vëllait të të shumëkërkuarit, Talo Çela; atentati ndaj Preng Gjinit dhe vrasja e Klevis Kapllanit në Rrogozhinë.
Burimi\Dosja.al
