Shqiptarët prej disa muajsh janë trembur dhe po i ruhen me frikë në zemër koronavirusit, por shkaktari që po vret më shumë syresh është ndotja e ajrit.
Këtë gjë e thonë ekspertët e mjedisit që po shqetësohen për ndotjen e jashtëzakonshme të ajrit në qytetet kryesore si Tirana, Durrësi, Elbasani.
Sipas tyre, 1/3 e personave që humbin jetën kanë shkak sëmundjet që shkaktohen nga ndotja e ajrit dhe e ujit.
Shqipëria renditet ndër vendet me ajrin më të ndotur në Europë pas Bosnjës.
Ekspertet e shëndetit duhet të ngrenë alarmin thotë, Redion Gjoka, specialist mjedisi, pasi po vdesin dy herë më shumë nga ndotja se sa nga Covid-19.
Përveç ndërtimeve të shumta që po zëvendësojnë me beton hapësirat e gjelbra, dhe po mbushin qytetet me pluhur çimentoje, hekuri dhe dheu, shkaktare kryesore të ndotjes janë edhe karburantet.
Sipas Gjokës në një intervistë për “TCH”, lëndën djegëse jo cilësore që përdorin automjetet janë një tjetër shkaktar i ndotjes së lartë dhe për pasojë edhe vdekjeve.
Por pavarësisht apelit të ekspertëve të mjedisit, si ndërtuesit që po betonizojnë dita-ditës qytetet tona, ashtu dhe kompanitë e shitjes së hidrokarbureve me cilësi të dobët, janë dy sektorët që mbështeten më fortë nga politika dhe që kanë bashkëpunim të ngushtë me qeverinë.
Nisur nga kjo, duket se përpjekja e ekspertëve të mjedist dhe lufta e qytetarëve për ambiente më të pastra, duket si një “mision i pamundur”, dhe kjo përkthehet në vdekshmëri të lartë të shqiptarëve, që tashmë ka kapërcyer edhe numrin e lindjeve.
/Burimi: TCH/Përshtati: GazetaReforma.com/
