Drejtuesja e Byrosë Kombëtarë të Hetimit (BKH) Aida Hajnaj dhe kreu i SPAK, Arben Kraja, ka pritur gjatë paradites së sotme në ambjentet e Gjykatës së Krimeve të Rënda (tashmë Gjykata e Posaçme SPAK), ambasadoren e SHBA-së në Tiranë, Yuri Kim.
Në këtë takim ambasadoren amerikane e kanë shoqëruar edhe ekspertë të FBI-së, të cilët do të merren me selektimin e agjentëve shqiptarë të BKH-së.
Bëhet me dije se qëlllimi i takimit ka qenë pikërisht përzgjedhja e 60 agjentëve të FBI-së shqiptare (BKH-së). 60 hetuesit e përzgjedhur, do të kenë akses në sistemet e informacionit, dosjet dhe të gjitha të dhënat e administruara nga degët e shtetit shqiptar, përfshirë çdo drejtori dhe nëndegë të saj, në kuadër të hetimit të veprave penale në kompetencë të SPAK.
Kujtojmë se deri më sot, SPAK ka 18 procedime dhe shumica e tyre lidhen me korrupsion tenderash nga zyrtarë të niveleve të ndryshme.
Sakaq hetimi më i fundit që SPAK kërkoi sekuestro preventive, ishin asetet e biznesmenit Ylli Ndroqi.
Lidhur me këtë vendim, ka pasur edhe një reagim të fortë të ambasadës së SHBA në Tiranë, që ka mbështetur punën e bërë nga SPAK duke theksuar se ka ardhur koha që anëtarët e SPAK të bëjnë punën e tyre pa kërcënime pavarësisht se kush do të jetë i pandehur.
