Presidenti Ilir Meta, ka nisur mëngjesin e sotëm takimet me krerët epartive në presidencë, me fokus caktimin e datës së zgjedhjeve të ardhshme parlamentare.
I pari që e ka hapur këtë tur takimesh gjatë ditës së sotme, ka qenë kreu i PDIU-së Shpëtim Idrizi.
Më pas presidenti ka takuar edhe përfaqësuesin e Partisë Republikane, nënkryetarin e kësaj partie, Arjan Madhi, pas ftesës që iu bë kreut të kësaj partie, Fatmir Mediut.
Ndërkohë sipas axhendës, presidenti Meta do të presë në Presidencë kryeministrin Edi Rama në orën 11:00. Kryeministri do të jetë i shoqëruar edhe nga kryetari i grupit të PS, Taulant Balla.
Kujtojmë se Rama pranoi dje ftesën e Presidentit Meta për tu takuar në presidencë, për tu konsultuar në lidhje me datën e zgjedhjeve të ardhshme. Ata u bashkuan gjatë këtyre dy ditëve në ceremoninë përkujtmore të 100 vjetorit të “Luftës së Vlorës” në Vlorë.
Pas takimit me kryeministrin Rama, sipas axhendës është parashikuar takimi në Presidencë me kreun e Partisë Demokratike, Lulzim Basha, i cili do të jetë i shoqëruar nga Oerd Bylykbashi.
Presidenti Meta ka deklaruar se ai do të vijojë takimet më pas edhe me liderët e partive të tjera opozitare.
