TURQI
Një tjetër person publik dhe ish-zyrtar i lartë shtetëror ka humbur jetën nga koronavirusi.
Këtë mëngjes, ka humbur betejën me Covid-19, ish-kryetari i Bashkisë së Lushnjës, Albert Sanxhaku.
Sanxhaku ishte infektuar me Covid-19 prej disa javësh dhe ishte nisur për t’u kuruar në një spital në Turqi.
Pavarësisht punës intensive të mjekëve për ta mbajtur në jetë atë, Sanxhaku nuk ia doli dot të fitojë betejën me jetën.
Albert Sanxhaku ka qenë kryetari i Bashkisë së Lushnjës në vitet 2007 – 2011.
Ai ka fituar zgjedhjet duke garuar nën siglën e Lëvizjes Socialiste për Integrim.
Sanxhaku ka mbajtur disa poste të rëndësishme institucionale, një ndër ta edhe zëvendës i Fondit të Kujdesit Shëndetësor.
Javë më parë, u raportua se një numër i konsiderueshëm personash të infektuar me koronavirus, më së tepërmi atyre që “ua mban xhepi”, ishin nisur drejt Italisë e Turqisë për t’u kuruar nga Covid-19.
Shqiptarët e kamur zgjidhin spitalet italiane (vendi ku pandemia shkaktoi shumë viktima) e ata turke, në kohën që ministrja e Shëndetësisë Ogerta Manastirliu propagandon se kujdesi shëndetësor në vend është i mirë.
