“Policia në dijeninë time ka ndërhyrë me kërkese të universitetit”. Kështu u shpreh numri një i qeverisë, Edi Rama, gjatë pyetjes së gazetarit Arian Çani, për dhunën e ushtruar nga efektivët e policisë ndaj studentëve protestues.
Në intervistën e sotme në ‘Zonë e Lirë’, Rama ka komentuar sërish protestën e studentëve, duke thënë se ajo tashme ka marrë fund dhe mësimi ka nisur normalisht. Por, sipas Ramës, janë vetëm tre fakultete që po mbahen peng nga 3 grupe studentësh, të cilët sipas tij, janë me axhendë politike.
Rama akuzoi se pas këtyre protestave, qëndrojnë “doktoresha (Monika Kryemadhi), artisti (Lulzim Basha) dhe Kadri Qorri (Arlind Qorri)”.
Çani madje iu drejtuar Ramën duke i thënë se as në kohën e monizmit, nuk janë prekur studentët, por Rama tha se ata po zaptojnë institucionet arsimore.
Pjesë e zbardhur nga intervista:
Çani: “As në kohën e Ramiz Alisë s’është përdorur policia për të dhunuar studentët në universitete”
Rama: “Për studentet sot në Shqipëri mësimi ka filluar normalisht përveç në 3 fakultete ku 3 grushte studentesh me axhendë politike po pengojnë të tjetër të hyjnë në mësim. Kam marrë qindra mesazhe që thonë ‘duam te bëjmë mësim’, po s’na lejojnë.
Policia në dijeninë time ka ndërhyrë me kërkese të universitetit”.
Çani: “Kush e ka kërkuar administratore i qeverisë?”
Rama: “Ata që e kane kërkuar…Këta që kanë bllokuar universitetin ç‘kërkojnë?”
Çani: “Kërkojnë rrëzimin e ligjit”
Rama: “Le të bëjnë një parti politike…”
