Kreu i Grupit Parlamentar të Partisë Socialiste, Taulant Balla, në një konferencë për mediat ka folur në lidhje me opinionet e Komisionit të Venecias.
Ai u shpreh se këto opinione janë shumë të rëndësishme, por Komisioni i Venecias nuk mund të vendosë kush ka të drejtë, por janë institucionet ato që vendosin.
Balla thotë që Komisioni i Venecias mbështet Reformën në Drejtësi, por edhe ligjin për mediat elektronike, të cilin e kanë quajtur të rëndësishëm.
“Opinioni përfundimtar i Venecias i miratuar dje jo vetëm që nuk ka hedhur poshtë ligjin si anti-kushtetues, por ka përkrahur nevojën e një ligji të tillë për rregullimin e tregut të mediave elektronike në Shqipëri, pasi “problemet e identifikuara nga autoritetet shqiptare objekt i rregullimit juridik janë serioze. Disa sanksione të justifikueshme të ligjit administrativ mund të jenë të dobishme për të luftuar abuzimet në fushën e mediave online”.
Midis përfundimeve kyçe, Venecia vlerëson se ligji është konsultuar gjerësisht me publikun, subjektet e interesuara dhe partnerët ndërkombëtarë. Gjithashtu, Venecia çmon se autoritetet shqiptare kanë qenë transparentë në përmirësimin e tekstit të projektligjeve. Sipas Venecias, autoritetet shqiptare demonstruan gatishmërinë e tyre për dialog dhe angazhimin e tyre për ruajtjen e fjalës së lirë në vend. Për shembull, është pozitive që në ligj shprehimisht përmendet që ky legjislacion duhet të interpretohet në dritën e praktikës gjyqësore të Gjykatës Evropiane për të Drejtat e Njeriut”, tha ndër të tjera Balla.
