Një tjetër çerdhe është mbyllur në Tiranë për shkak të Covid-19, pasi një edukatore ka rezultuar pozitive.
Mësohet se bëhet fjalë për çerdhen “Fluturat”, që ndodhet në Laprakë në rrugën “Pandi Dardha”.
Lajmin e kanë bërë të ditur autoritetet shëndetësore në Tiranë.
“Në datën 12 Qershor, ditën e Premte, në momentin e paraqitjes në punë, në zbatim të protokollit të masave për parandalimin e përhapjes së COVID-19, në çerdhen nr.11 u konstatua një punonjëse me temperaturë.
Që nga ajo ditë, punonjësja nuk u lejua të futej në mjediset e punës dhe është karantinuar në banesën e saj.
Pasi rasti i saj u raportua, mësohet se iu krye edhe tamponi.
Operatori i Kujdesit Shëndetësor Vendor pasi ka konstatuar rastin ka vënë në dijeni Drejtorinë e Çerdheve dhe Kopshteve për masat e rrepta që duhen marrë.
Këto masa do të kontrollohen nga ISHSH”, shkruhet në njoftimin e Operatorit të Shërbimeve të Kujdesit Shëndetësor.
Kujtojmë këtu, rastin e ndodhur disa ditë më parë në çerdhen nr.6 në rrugën “Nikolla Tupe” në Tiranë që u mbyll për shkak se një punonjëse e stafit rezultoi pozitive më Covid-19.
Ditën e sotme Ministria e Shëndetësisë, në daljen e saj për mediat raportoi për 50 raste të reja të infektuara me koronavirus në 24 orët e fundit, në vendin tonë.
Numri i viktimave ka shkuar në 42, ku ditën e sotme humbi jetën një pacient 69-vjeçar nga Kruja për shkak të koronavirusit.
