Programi për zhvillim i Kombeve të Bashkuara, PNEUD ka realizuar një anketë për të analizuar perceptimin e qytetarëve në lidhje me ndikimin që ka pasur reforma administrative mbi shërbimet që ofrojnë bashkitë në vend.
Vlerësimi merr në konsideratë disa karakteristika të ofrimit të shërbimeve si cilësia, gatishmëria, dhe qasja në shërbime, lehtësia e marrjes së tyre etj.
Anketa e PNUD tregon se vlerësimet e bashkive lidhur me kënaqësinë ndaj shërbimeve shkojnë nga intervali “mesatar”..
Asnjë bashki e madhe nuk renditet mes 10 të parave, ndërkohë që Durrësi e Tirana renditet te 10 të fundit.
Lista e 10 bashkive më të mira dhe më të dobëta tregon se nuk ekziston asnjë korrelacion midis nivelit të kënaqësisë me shërbimet dhe nivelit të mbledhjes së të ardhurave vendore.
Kështu, Tirana ka rezultate të shkëlqyera në mbledhjen e të ardhurave, por ka dështuar në kënaqësinë me shërbimet.
Vlen të theksohet se të ardhurat e Bashkisë Tiranë janë rritur ndjeshëm 3 vitet e fundit.
Burimi kryesor i të ardhurave të buxhetit të Bashkisë që prej vitit 2017 është taksa e ndikimit në infrastrukturë nga ndërtimet e reja. Për vitin 2019, Bashkia e Tiranës në dhjetor vlerësonte se priste të arkëtonte 6 miliardë lekë nga Taksa e ndikimit në infrastrukturë nga ndërtimet e reja, ose 52% më shumë sesa planifikimi që kishte në fillim të vitit (15% më shumë se fakti i 2018-s). Sipas relacionit, realizimi i të ardhurave nga kjo taksë tejkalon planin e miratuar si rrjedhojë e aplikimeve përtej parashikimeve nga strukturat përgjegjëse.
Prej disa vitesh, buxheti i Bashkisë së Tiranës është bërë tepër i varur nga të ardhurat që merr si rrjedhojë e lejeve të ndërtimit. Rekordi u shënua në 2019-n, me gati 45% të të ardhurave të veta.
Në total, sipërfaqja e dhënë për leje ndërtimi për 2019-n në kryeqytet, sipas INSTAT ishte rreth 1.5 milionë metra katror, me një rritje prej 55% në raport me vitin e mëparshëm dhe duke shënuar një nivel rekord të paktën që prej vitit 2010, kur raportohen të dhënat e detajuara sipas rretheve.
Taksa e dytë që sjell më shumë të ardhura është ajo mbi pasurinë e paluajtshme për bizneset dhe individët, me 14.2% të totalit, e ndjekur nga tarifa e pastrimit me 13.8%. Arsimi sjell 5.5% të të ardhurave. Vitet e fundit janë rritur dhe të ardhurat nga tarifat e parkimit, me 3.4% të të ardhurave.
Po ashtu, edhe Bashkia e Vorës, Durrësit dhe Himarës janë mes atyre bashkive që kanë rezultatet më të mira në mbledhjen e të ardhurave, por renditen në fund sa i takon kënaqësisë me shërbimet.
Në 10 bashkitë që zënë vendin e parë për ofrimin e shërbimeve, anketa ka gjetur se niveli i kënaqësisë ndaj shërbimeve arrin nga 75-81 për qind, duke e renditur Bashkinë e Poliçanit të parën në shkallë vendi.
Po ashtu, në listën e bashkive me shërbimin më të kënaqshëm renditet edhe Bashkia e Roskovecit, Shijakut, Dropullit, Skraparit, Delvinës, Tepelenës, Pukës, Maliqit dhe Belshit janë më të kënaqurit me shërbimet që ofron pushteti vendor.
Në të kundërt qytetarët e bashkive Vorë, Rrogozhinë, Himarë, Ura Vajgurore, Malësia e Madhe, Memaliajit, Kavajës, Pustecit dhe Klosit janë më pak të kënaqur me shërbimet vendore, duke i renditur bashkitë tyre në dhjetëshen më të dobët në vend.
Ofrimi i shërbimeve në nivel vendor është funksioni bazë i qeverisjes vendore.
Qytetarët presin të marrin shërbime të barabarta dhe cilësore, që përmbushin nevojat dhe kërkesat e tyre në rritje.
