Rritja e rasteve të reja me Covid-19, duke e çuar numrin total të të infektuarve në 1,590 ka bërë që të gjithë t’i druhemi rikthimit të karantinës, që na mbajti të izoluar në shtëpi për dy muaj.
Kryetarja e Komunitetit Anti-Covid Mira Rakacolli ka theksuar sot se shtimi i numrit të rasteve me Covid-19, ishte e parashikuar në politikat e hapjes.
Sipas zv.ministres, rikthimi në karantinë për momentin nuk është një opsion, por nëse numri i të infektuarve do të pësojë rritje dhe do të rrezikojmë sistemin tonë shëndetësor, karantinimi do të rikthehet sërish.
“Kjo është normale të ndodhi në çdo politikë hapje, me hapjen ishte një gjë e parashikuar sepse me politikën e hapjes rritet numri i njerëzve që kanë kontakt me njëri-tjetrit, zgjatet koha që ata rrinë dhe njëkohësisht zgjatet edhe ekspozimi ndaj koronavirusit. Në çdo lloj politikë hapje shtimi i numrit të rasteve është i pritshëm. Normalisht në këtë politikën tonë të hapjes, për çdo biznes, për çdo lloj aktiviteti janë përcaktuar protokolle rigoroze që nëse zbatohen rritja është e vogël dhe mjaft e kontrolluar. Gjykohet në bazë të shtruarit në spital. Gjykohet mbi bazën e atyre që janë rëndë në njësitë e kujdesit intensiv. Natyrisht me numrin e atyre që brenda janë të intubuar dhe normalisht me numrin e fataliteteve. Mund të them që duke kanalizuar këto tregues që kemi deri më tani, vijojmë të mbetemi në situatë të kontrolluar. Nuk duhet të vazhdojmë me sjelljet që janë vënë re kohët e fundit karshi mosrespektimit si duhet të protokolleve që me aq përgjegjësi u respektuan nga qytetarët në fazën e parë. Gjëja më e thjeshtë dhe më normale është vendosja e maskave në ambientet e mbyllura. Gjëja më e thjeshtë dhe normale është të respektojmë distancimin fizik. Ditët e para të gjithë ruanin distancimin fizik, mbanin maska”, u shpreh Rakacolli.
Ndërkaq, në një intervistë për “Top Talk”, Mira Rakacolli shpjegoi se përse QSUT-ja është kthyer në një vatër infektimi.
Sipas saj, ndonëse personeli mjekësor është i pajisur me veshje mbrojtëse, kjo nuk i përjashton ata nga infektimi, sepse ndodh që të infektohen edhe gjatë zhveshjes.
“Atëherë unë nuk do të përdorja fjalën qendër e përhapjes. Sepse rastet aktive nuk janë përhapur të gjitha nga QSUT-ja. Infektimi i personelit shëndetësor është një fenomen mbarë botërorë dhe është një fenomen i pranishëm në çdo strukturë që merret me trajtimin e sëmundjeve infektive. Edhe përdorimi nga njerëzit më rigorozë i mjeteve mbrojtëse. Siç është si “astronaut”, përdorimi atë veshje të mbron nga kontakti me virusin, por virusin e merr dhe me ato veshje mbrojtëse. Një pjesë e mirë e personelit mjekësor e merr virusin nga zhveshja e këtyre veshjeve”, vijoi ajo.
Rakacolli u bëri apel qytetarëve që të respektojnë masat, të mbajnë maska në ambiente të mbyllura, të përdorin dezinfektantë, pasi në këtë mënyrë nuk rrezikojmë të rikthehemi në karantinë.
