Një pallat 9 katësh me vlerë 1.5 milionë euro në Shkëmbin e Kavajës është sekuestruar pasi kishte probleme me lejen e ndërtimit.
Prona i përket personit me iniciale J.A i cili kishte probleme me lejen e ndërtimit.
Prokuroria ka nisur hetimet për ish-kryetarin e komunës Rrashbull, Hysen Gashi.Ky i fundit akuzohet për “Shpërdorim detyre” dhe lëshimin e lejes së ndërtimit për këtë objekt.
Njoftimi i plotë
Vendoset sekuestro preventive për një pallat 9-katësh me vlerë 1.5 milionë euro. Në vijim të veprimeve të kryera nga Specialistët për Hetimin e Krimit Ekonomik e Financiar, nën drejtimin e Prokurorisë së Rrethit Gjyqësor Durrës, për veprën penale “Shpërdorim detyre”, në ngarkim të shtetasit H. G., ish-kryetar e komunës Rrashbull, pas informacioneve që dispononte Policia, veprimet janë intensifikuar më tej për verifikimin e lejeve të ndërtimit të lëshuara për çdo objekt. Me urdhër të prokurorit të Prokuroisë Durrës u bë ekzekutimi i vendimit penal të Gjykatës së Shkallës së Parë Durrës, për vendosjen e masës së sigurimit pasuror, “Sekuestro preventive”, si dhe në bashkëpunim me IKMT-në u urdhërua pezullimi i punimeve që kryheshin në objektin pallat 9-katësh + papafingo +1 kat nën tokë, me administrator shtetasin J. A., banues në Durrës, ndëtim në zonën e Shkëmbit të Kavajës. Shuma e sekuestrimit kap vlerën 1.5 milionë euro, sipas çmimit të tregut. Materialet shtesë i kaluan Prokurorisë së Rrethit Gjyqësor Durrës, për veprime të mëtejshme.
