Kreu i Organizatës Botërore të Shëndetit Tedros Adhanom Ghebreyesus ka deklaruar se ai është me të vërtetë i shqetësuar për ndarjet që koronavirusi ka krijuar globalisht dhe brenda shteteve, duke e quajtur atë një virus të padukshëm dhe të vogël, por që shkakton shkatërrim.
“Bota nuk ka parë kurrë diçka të tillë që nga gripi në 1918,” tha kreu i Përgjithshëm i OBSH-së, duke krahasuar pandeminë e Covid-19 me pandeminë e gripit spanjoll, në shumë se një shekull më parë që besohet të ketë vrarë në të paktën 50 milion njerëz.
Duke u bërë thirrje shteteve të mësojnë nga historia dhe “të bëjnë më mirë”, Tedros tha se mungesa e unitetit politik gjatë krizës aktuale është problematike.
Ndonëse Tedros nuk i përmendi, dy fuqitë kryesore ekonomike në botë – Shtetet e Bashkuara, e cila ka numrin më të lartë të rasteve dhe të vdekjeve nga pandemia dhe Kina, ku u shfaq për herë të parë Covid-19 – kanë drejtuar ndaj njëra-tjetrës akuza për origjinën dhe trajtimin e koronavirusit.
Dr Michael Ryan, shefi i urgjencave në OBSH tha se koronavirusi aktualisht është “më aktiv” në Amerikë, me katër nga 10 vendet me më shumë raste dhe vdekje në të gjithë botën, të vendosura në Amerikën e Veriut dhe Amerikën e Jugut.
Ai vuri në dukje në mënyrë të veçantë që rritja e rasteve në Brazil është shqetësuese.
“Është e qartë se disa zona të Brazilit kanë mjaft presion mbi sistemin e kujdesit intensiv. Ka pika të nxehta të qarta në zonat me shumë popullsi.”
Ryan tha se disa nga zonat administrative të Brazilit kanë marrë mbi 80% të kapacitetit të njësisë së tyre për kujdes intensiv, dhe disa janë në një fazë kritike me mbi 90% të shtretërve të tyre të mbushura.
Brazili ka raportuar mbi 802,000 raste të konfirmuara – vendi i dytë në botë pas Shteteve të Bashkuara – dhe mbi 40,000 vdekje, kurse SHBA ka mbi 2 milionë raste të konfirmuara dhe 114,000 vdekje
“Të dhënat që kemi për momentin mbështesin një sistem nën presion, por një sistem që akoma përballon numrin e rasteve të rënda,” tha Ryan.
Të rinjtë që janë të prekshëm nga ankthi dhe depresioni gjithashtu janë në rrezik më të madh gjatë pandemisë, tha Tedros, duke përmendur se në disa vende, më shumë se një e treta e adoleshentëve marrin ndihmë për shëndetin mendor ekskluzivisht në shkollë.
