Kryetari i Komisionit të Dhomës së Përfaqësuesve për Marrëdhëniet me Jashtë, Eliot L. Engel tha se marrëveshja për reformën zgjedhore në Shqipëri duhet të kthehet në ligj.
Eliot tha se kjo përfshin disa hapa pozitivë, por në të njëjtën kohë la të kuptohet që ka ende mangësi.
“Ajo përfshin klauzola për depolitizimin e administratës së zgjedhjeve, zgjerimin e transparencës dhe më shumë pavarësi për punonjësit e zgjedhjeve. Çka është më e rëndësishme, do t’i hapë rrugën Shqipërisë për të filluar procesin e anëtarësimit në BE dhe duhet të kthehet në ligj”, tha ai përmes një deklarate.
Gjithashtu Eliot shtoi se duhet të merren në konsideratë të gjitha zërat nga parlamenti.
“Dhe në të ardhmen e afërt të shqyrtojë një masë shtesë në të ardhmen e afërt që të përfshijë lista të hapura dhe t’u jape mundësi shqiptaro-amerikanëve dhe shqiptarëve të tjerë në diasporë që të votojnë në zgjedhjet e vitit 2021nga vendi i tyre i rezidencës”, tha zoti Engel.
Ai u bën thirrje “miqve të tij në Shqipëri, të vazhdojnë të punojnë për reformën zgjedhore, në mënyrë që demokracia të jetë e fortë, me themele të forta dhe me bazë të gjerë”.
Javën e kaluar në vend palët politike arritën një marrëveshje për reformën zgjedhore. Kjo erdhi pas rekomandimeve nga OSBE/ODIHR-it lidhur me depolitizimin e administratës zgjedhore.
