Vetëm 4 ditë nga rikthimi i nxënësve të klasave të nënta në bankat e shkollës, Ministria e Arsimit, Shkencës, Teknologjisë dhe Inovacionit (MASHTI) në Kosovë ka vendosur që të ndërpresë mësimin ditën e sotme.
Më 8 qershor, në Kosovë nisi mësimi plotësues për këto klasë, pas disa muajsh ndërprerjeje për shkak të pandemisë së koronavirusit, me qëllim që nxënësit të përgatiteshin për “Provimin e Lirimit”.
Mirëpo, ministri i MASHTI-t, Ramë Likaj, në një konferencë për media tha se masat mbrojtëse kundër Covid-19 nuk po respektohen duke rrezikuar jo vetëm shëndetin e nxënësve, por edhe të komunitetit.
“Edhe përkundër përgatitjeve jashtëzakonisht të mëdha dhe ndihmës që kanë dhënë drejtoritë komunale të arsimit, shkollat, prindërit dhe institucionet e tjera, informatat nga terreni na kanë treguar se masat mbrojtëse nuk janë duke u respektuar sa duhet”, tha ministri i MASHTI-t, Ramë Likaj, në një konferencë për media.
Kështu, Likaj ka njoftuar ndërprerjen e mësimit, duke e konsideruar situatën “shqetësuese”, pasi virusi vijon të qarkullojë në Kosovë.
“Me qëllim të mbrojtjes së nxënësve, stafit mësimor dhe të gjithë qytetarëve, kemi vendosur që mësimi plotësues për klasët e nënta në javën e dytë të ndërpritet deri në masat e tjera. Pamë se situata është shumë shqetësuese dhe virusi është prezent në Kosovë”, tha ministri Likaj.
Vetëm në 24 orët e fundit në shtetin e Kosovës është regjistruar një shifër rekord e rasteve të reja, pasi ISHPK njoftoi 58 të infektuar, gjë që i ka shtyrë autoritetet të paralajmërojnë rikthimin e masave të izolimit.
Në total janë konfirmuar gjithsej 1,384 raste me koronavirus, prej të cilave 921 janë shëruar dhe 31 kanë vdekur.
